SI mótmæla viðbótarsköttum

Samtök iðnaðarins mótmæla harðlega viðbótarsköttum og segja það ákaflega veika aðgerð að hækka eldsneytisgjöld til að draga úr þenslu. Þess í stað verði áhrifin auknar byrðar á fyrirtæki og heimili og að hækkunin fari beint út í verðlag. Þá mótmæla samtökin að tryggingagjald skuli ekki vera lækkað eins og samkomulag stjórnvalda og aðila vinnumarkaðarins í janúar kvað á um.

Samkvæmt fjárlagafrumvarpinu er gert ráð fyrir 2,2 prósenta hækkun á krónutölusköttum og gjaldskrám. SI gera ekki athugasemd við það að halda raunsköttum óbreyttum. Hins vegar setja samtökin út á sérstaka 2,5 prósenta hækkun á bensín, áfengi og tóbak til að slá á þensluáhrif.

„Ef ætlunin er að beita ríkisfjármálum með það að markmiði að draga úr þenslu væri árangursríkara að gera það á útgjaldahlið ríkisfjármála eða með almennum hætti í skattkerfinu. Skatttekjur ríkissjóðs eru þegar að vaxa umtalsvert vegna aukinna umsvifa í hagkerfinu og það eru engin rök til þess að hækka þessar vörur sem bera krónutöluskatta sérstaklega umfram aðrar vörur,“ segir Almar Guðmundsson, framkvæmdastjóri SI í tilkynningu.

Hann segir hækkunina þar að auki byggja á veikum forsendum. Ríkið áætlar að hækkunin skili ríkissjóði 3,2 milljörðum króna.

„Í fyrsta lagi fer hækkun á þessum gjöldum beint út í verðlag. Reikna má með að vísitala neysluverðs hækki um 0,2% bara vegna þessarar hækkunar og eykur þannig verðbólgu sem því nemur og dregur úr kaupmætti. Verðbólga er einn þenslumælikvarði og þessi skattahækkun eykur á hana. Í öðru lagi er um að ræða viðbótarskattahækkun á vörur sem þegar bera mjög háa skatta svo sem áfengi, bensín og olíu. Áfengisskattar á Íslandi eru nú þegar með því hæsta sem þekkist í heiminum og hafa hækkað mun meira en almennt verðlag síðustu ár.“

Samtök iðnaðarins mótmæla því einnig að tryggingagjald skuli ekki lækkað líkt og samkomulag stjórnvalda og aðila vinnumarkaðarins í janúar 2016 kvað á um.

Þá var samþykkt að framlag atvinnurekenda í lífeyrissjóði myndi hækka um hálft prósentustig á þessu ári, eitt og hálft á því næsta og sömuleiðis árið 2018. Í tilkynningu SI segir að tryggingagjald hafi verið lækkað á þessu ári um hálft prósentustig og fyrirheit um frekari lækkanir á næstu árum til að mæta auknu framlagi í lífeyrissjóði.

„Sameiginlegur skilningur aðila var að gjaldið færi niður í 4,5% árið 2015. Samtökin leggja því mikla áherslu á að staðið verði við samkomulagið og tryggingagjald verði lækkað um 0,5% stig 1. júlí 2017 og aftur 1. júlí 2018,“ segir í tilkynningunni.