Drottningin snýr aftur

Ronda Rousey var skærasta stjarna MMA heimsins, hæst launaðasti íþróttamaðurinn í UFC og á toppi tilverunnar. Fyrir 13 mánuðum síðan breyttist þetta allt saman á einu kvöldi þegar Holly Holm rotaði hana með hásparki eftir að hafa haft gífurlega yfirburði í bardaganum. Rothöggið fór ekki fram hjá neinum en fram að því hafði Ronda litið út fyrir að vera því sem næst ósigrandi.

Ronda var fyrirmynd ungra stúlkna, fjölmiðlar kölluðu hana Mike Tyson okkar tíma, Beyoncé var að vitna í hana á tónleikum og hún mætti í alla vinsælustu spjallþættina. Eftir tapið hvarf hún hins vegar úr sviðsljósinu og lét ekki sjá sig opinberlega í marga mánuði.

Á meðan Ronda hélt sig frá búrinu gekk beltið í bantamvigtinni kvenna á milli eins og heit kartafla. Holly Holm vann titilinn af Rondu en tapaði svo beltinu í sinni fyrstu titilvörn gegn Mieshu Tate. Ekki tókst Tate betur enda tapaði hún fyrir hinni brasilísku Amöndu Nunes eftir hengingu í 1. lotu.

Í nótt, 13 mánuðum eftir tapið, snýr drottning UFC aftur í búrið þegar hún mætir nýja meistaranum Nunes og getur endurheimt beltið, stoltið og aðdáun bardagaunnenda.

Fyrir utan einstaka viðtöl eins og í þætti Ellen hefur hún nánast ekkert talað um tapið erfiða gegn Holly Holm. Fyrir bardagann gegn Nunes hefur hún neitað að tala við fjölmiðla og var enginn blaðamannafundur haldinn fyrir bardagakvöldið líkt og venjan er. Hún hefur því ekki þurft að svara erfiðum spurningum um bardagann eða spurningum um þjálfarateymið sem gaf henni hræðileg ráð eftir fyrstu lotuna gegn Holm.

Ronda heldur því fram að fjölmiðlar hafi snúið baki við sér og hefur ekki áhuga á að gera neitt nema að vinna bardagann. Einnig brást hún illa við þegar kollegi hennar í UFC, Paige VanZant, ætlaði að tala við hana fyrr á árinu. Ronda neitaði að tala við VanZant þar sem hún hafði óskað Holm til hamingju með sigurinn gegn Rondu á sínum tíma á samfélagsmiðlum.

Bardaginn gegn Holm og hvernig hún hefur brugðist við tapinu setur stórt spurningarmerki við hugarástand Rondu Rousey. Sú staðreynd að hún vilji ekki svara spurningum um bardagann lætur hana líta út fyrir að vera viðkvæma og það vill enginn rétt fyrir bardaga.

Það er engin tilviljun að Amanda Nunes sé meistarinn í dag. Hún er feikilega góð bardagakona og af 13 sigrum hennar hafa níu komið eftir rothögg. Þá er Nunes með tíu sigra í fyrstu lotu og gott bakland þjálfara með sér. Stuðlarnir fyrir bardagann eru hnífjafnir en Ronda hefur ávallt verið talsvert sigurstranglegri hjá veðbönkum fyrir bardaga sína þar til nú. Bardagaaðdáendur efast um að hún sé jafn öflug og hún áður var.

Núna eru 411 dagar síðan Ronda barðist síðast og vitum við í raun ekkert hvað hún er búin að vera að gera síðan hún barðist síðast. Hún lítur út fyrir að vera í hörku formi en hversu mikið hefur hún bætt sig frá því við sáum hana síðast?

Enn eitt spurningarmerkið fyrir þennan bardaga er þjálfari Rondu Rousey - hinn umdeildi Edmond Tarverdyan. Edmond fékk sinn skerf af gagnrýni áður en Ronda barðist við Holm og talaði mamma hennar um hve ömurlegur þjálfari og hve ömurleg persóna hann væri. Helst vildi hún aka yfir hann á bílnum sínum en það eina sem var að stoppa hana voru lögin.

Gagnrýnin óx ásmegin eftir tapið gegn Holm enda virtist Ronda vera ráðþrota snemma í bardaganum og fékk hún engin vitsmunaleg ráð frá Edmond. Edmond er einn umdeildasti karakterinn í MMA heiminum í dag og hafa fáir bardagamenn staðið sig vel undir hans leiðsögn.

Það er ljóst að þetta verður virkilega áhugaverður bardagi. Ronda Rousey sagði nýlega að þetta gæti verið einn af hennar síðustu bardögum og velta margir því fyrir sér hvort Ronda muni hreinlega hætta ef hún tapar.

Munum við sjá gömlu góðu Rondu Rousey sem valtaði yfir andstæðingana í einni lotu? Eða hefur hún ekki enn jafnað sig eftir þetta erfiða tap? Mun hún brotna í bardaganum eftir fyrsta þunga höggið frá Nunes?

Við munum komast að því í nótt þegar Ronda Rousey mætir Amöndu Nunes í aðalbardaganum á UFC 207. Bardagakvöldið verður í beinni útsendingu á Stöð 2 Sport og hefst bein útsending kl 3.