Sjó­menn og út­gerðar­menn funduðu með sjávar­út­vegs­ráð­herra

Útgerðarmenn og sjómenn fóru til fundar í sjávarútvegsráðuneytinu á ellefta tímanum í kvöld. Funduðu þeir saman með Þorgerði Katrínu Gunnarsdóttur, sjávarútvegsráðherra, vegna kjaradeilunnar en ekki fást upplýsingar um það hvað fram fór á fundinum sem varði ekki lengi.

Samninganefndir sjómanna og útgerðarmanna hafa fundað stíft hjá ríkissáttasemjara í dag en sjómenn hafa verið í verkfalli í tvo mánuði. Deiluaðilar hafa verið í fjölmiðlabanni síðan í seinustu viku og í dag var Karphúsinu lokað fyrir fjölmiðlum sem ekki fengu að fara þar inn.

Það hefur því lítið fengist uppgefið varðandi viðræðurnar en fyrir liggur að sjómenn vilja fá fæðispeninga og skattaafslátt af þeim. Það styðja útgerðarmenn en aðkomu ríkisins þarf til að hægt sé að semja um það.