58. leikur tímabilsins hjá Manchester United í kvöld | Ná ekki metinu

Það hefur verið nóg að gera hjá Manchester United á þessu fyrsta tímabili liðsins undir stjórn Jose Mourinho.

Liðið spilar gríðarlega mikilvægan leik í kvöld þegar liðið mætir spænska liðinu Celta Vigo í fyrri leik liðanna í undanúrslitum Evrópudeildarinnar.

Þetta er 58. keppnisleikur Manchester United á tímabilinu 2016-17 en liðið hefur auk leikja í ensku úrvalsdeildinni farið langt í bikarkeppnunum og svo í Evrópudeildinni þar sem United er að berjast fyrir sæti í Meistaradeildinni á næstu leiktíð.

Gangi allt upp hjá Manchester United þá mun það alls spila 64 leiki á leiktíðinni sem er aðeins tveimur leikjum frá félagsmetinu.

Manchester United spilaði 66 leiki á þrennutímabilinu 2008-09 þegar liðið vann Englandsmeistaratitilinn, enska bikarinn og Meistaradeildina auk þess að taka þá í meistarakeppni UEFA og heimsmeistarakeppni félagsliða.

Sir Alex Ferguson, knattspyrnustjóri Manchester United 2008-09, notaði 36 leikmenn þetta tímabil. Fjórir af þeim, Cristiano Ronaldo, Nemanja Vidic, John O'Shea og Carlos Tevez, náðu að spila yfir 50 leiki þetta tímabil. Ellefu af þessum 36 leikmönnum léku fimm leiki eða færri.

Jose Mourinho hefur notað 28 leikmenn á þessu tímabili en aðeins þeir Paul Pogba og Marcus Rashford eiga möguleika á því að ná 50 leikjum. Þrír af þessum 28 leikmönnum hafa leikið fimm leiki eða færri.

Manchester United liðið hefur þegar spilað 34 leiki í ensku úrvalsdeildinni, einn leik um Samfélagsskjöldinn, sex leiki í enska deildabikarnum, fjóra leiki í enska bikarnum og loks tólf leiki í Evrópudeildinni.