Góð byrjun Ég man þig nær þó ekki góðu gengi vinsælustu íslensku kvikmyndanna

Hrollvekjan Ég man þig hefur farið virkilega vel af stað í kvikmyndahúsum síðan hún var frumsýnd 3. maí síðastliðinn en á þó nokkuð í að ná þeim íslensku kvikmyndum sem hefur gengið hvað best í gegnum tíðina.

Neðst í greininni má sjá súlurit eftir gengi stærstu mynda síðustu ára.

19.381 sáu myndina á fyrstu tíu dögum myndarinnar í sýningu . Það er töluvert frá kvikmyndinni Mýrinni sem náði að laða 38.811 manns í bíó á fyrstu 10 sýningardögunum í október árið 2006.

Gagnagrunnur sem nær aftur til 1995

Vísir fékk FRÍSK, Félag rétthafa í sjónvarps- og kvikmyndaiðnaði, til að bera aðsókn Ég man þig saman við aðrar myndir sem hafa fengið mikla aðsókn á síðustu árum. FRÍSK rekur gagnagrunn sem heldur utan um aðsókn á íslenskar kvikmyndir og nær hann aftur til ársins 1995.

Það var fyrirtækið Hagvangur sem hóf vinnslu á slíkum gögnum árið 1995 en FRÍSK tók við þeirri vinnu. FRÍSK er með endurskoðunarákvæði á sínum tölum sem félagið fær beint úr miðasölukerfi kvikmyndahúsa og sækir til að mynda Hagstofan tölur frá félaginu.

Það þýðir að allar aðsóknartölur fyrir árið 1995 eru óstaðfestar af FRÍSK og þær myndir sem voru frumsýndar fyrir það ár ekki teknar með.

Mýrin trónir á toppnum

Enn sem komið er, er kvikmyndin Mýrin, eftir Baltasar Kormák, sú kvikmynd sem hefur notið mestra vinsælda í kvikmyndahúsum hér á landi. Myndin þénaði 41,2 milljónir króna á fyrstu 10 sýningardögum hennar.

Til samanburðar hefur Ég man þig, eftir Óskar Axelsson, þénað 30,5 milljónir króna á fyrstu 10 sýningardögum hennar.

Önnur mynd Óskars, Svartur á leik, fékk 27.242 manns á fyrstu 10 sýningardögum hennar árið 2012 og þénaði 35,5 milljónir króna í miðasölu kvikmyndahúsa á þessu tímabili.

Englar alheimsins, eftir Friðrik Þór Friðriksson, fékk 22.647 manns í bíó á fyrstu 10 sýningardögum hennar og þénaði 19,1 milljón króna í miðasölu.

Vonarstræti, eftir Baldvin Z, fékk 19.111 manns á fyrstu 10 sýningardögum hennar og þénaði 27,1 milljón króna í miðasölu.

Í heildina sáu 88.445 Mýrina í bíó hér á landi og þénaði hún í heildina 90,9 milljónir króna.

Heildaraðsókn á Engla alheimsins í bíó hér á landi var 82.264 gestir og þénaði hún 67,7 milljónir króna.

62.783 sáu Svartan á leik í bíó hér á landi og þénaði myndin 83,370 milljónir króna.

47.982 sáu Vonarstræti í bíó hér á landi og þénaði hún 69,6 milljónir króna.

Í fyrra þénaði Eiðurinn, eftir Baltasar Kormák, 63 milljónir króna í bíó hér á landi.

Afar góð byrjun á Ég man þig

Hallgrímur Kristinsson, hjá FRÍSK, segir að þó svo að Ég man þig sé töluvert á eftir þeim íslensku myndum sem hefur gengið hvað best í bíói hér á landi, þá sé þetta afar góð byrjun á þessari mynd.

Hann segir FRÍSK ávallt miða við tekjur þegar horft er til vinsælda íslenskra kvikmynda. Það sé rétti mælikvarðinn því aðsóknartölur geti blekkt ef aðeins er miðað við hausatölu, því ansi margir boðsmiðar gætu verið þar að baki.

Mýrin sé því talin stærsta íslenska kvikmyndin síðustu tveggja áratuga, eða frá því þessum gagnagrunni yfir aðsókn mynda var komið á. Þá tekur hann fram að aðsókn á myndina hefði líklega orðið meiri ef ekki hefði verið fyrir til dæmis Eurovision.

„Almennt þegar veðrið er svona gott eins og var fyrstu helgina þá erum við að sjá lægri aðsóknartölur, því fólk er að grilla en ekki í bíó. Og þegar Eurovision er í gangi þá er fólk fast fyrir framan sjónvarpið. Það þýðir samt ekki að ekkert sambærilegt hafi verið í gangi áður. En það eru mjög miklar líkur á því að við værum að horfa á hærri aðsókn ef það hefði ekki hitt á þetta góða veður og Eurovision,“ segir Hallgrímur.

Aðsóknartölur Með allt á hreinu óstaðfestar af FRÍSK

Með allt á hreinu, kvikmynd eftir Ágúst Guðmundsson sem sagði frá ævintýrum hljómsveitanna Stuðmanna og Grýlanna, er sögð hafa fengið 118 þúsund manns í bíó frá frumsýningu myndarinnar árið 1982 til loka sýninga árið 1983. Þetta var á þeim tíma sem Íslendingar töldu um 270 þúsund manns og því ansi hátt hlutfall sem sá þá mynd.

Hallgrímur segir að FRÍSK geti ekki miðað við þær tölur því það sé einfaldlega ekki hægt að staðfesta þær út frá þeim forsendum sem félagið gefur sér.

„Almennt þegar veðrið er svona gott eins og var fyrstu helgina þá erum við að sjá lægri aðsóknartölur, því fólk er að grilla en ekki í bíó. Og þegar Eurovision er í gangi þá er fólk fast fyrir framan sjónvarpið. Það þýðir samt ekki að ekkert sambærilegt hafi verið í gangi áður. En það eru mjög miklar líkur á því að við værum að horfa á hærri aðsókn ef það hefði ekki hitt á þetta góða veður og Eurovision,“ segir Hallgrímur.