Bónus gefur milljón í söfnun Hróksins

Bónus hyggst gefa eina milljón króna í söfnun skákklúbbsins Hróksins sem fer fram um helgina í þágu stríðshrjáðra barna í Sýrlandi og Jemen. Hrafn Jökulsson, forseti Hróksins, greinir frá þessu á Facebook síðu sinni.

Hrafn greinir frá því að Guðmundur Marteinsson, framkvæmdastjóri Bónus, hafi sent honum póst og fært honum gleðitíðindi.

Sæll meistari, votta þér og þínum samúð mína við fráfall mömmu þinnar, ég er virkilega stoltur af þér meistari fyrir hvað þú leggur á þig fyrir þá sem minna mega sín og mættu fleiri taka þig sér til fyrirmyndar, Bónus kemur með 1 milljón í þessa söfnun. Gangi þér sem best!

Hrafn og Hrókurinn standa fyrir skákmaraþoni um þessa helgi og er safnað áheitum og framlögum í þágu UNICEF og Fatimusjóðs, sem nú standa fyrir neyðarsöfnun.

Hrafn ætlar sér meðal annars sjálfur að tefla 200 skákir á 30 klukkustundum en meðal þeirra sem ætla sér að tefla við Hrafn eru  Dagur B. Eggertsson borgarstjóri og Bjarni Benediktsson forsætisráðherra. Hrafn mun svo tefla við Guðna Th. Jóhannesson forseta Íslands, í dag klukkan 13:00. 

Skákmaraþonið fer fram í Pakkhúsi Hróksins, Geirsgötu 11, við Reykjavíkurhöfn, en dagskrá hófst klukkan 9 í morgun og ætlar Hrafn sér að sitja við til miðnættis, líkt og í gær og er opið hús allan tímann.

Á síðasta ári söfnuðust um 3 milljónir í skákmaraþoni Hróksins sem runnu óskiptar í neyðarhjálp í Sýrlandi og vonast er eftir því að sú upphæð verði hærri í ár. Ljóst er að framlag Bónus mun þar eflaust skipta sköpum.