Þar sem töfrarnir gerast

Vef- og auglýsingahönnuðurinn Rakel Ólafsdóttir hefur teiknað og málað frá því hún man eftir sér og elskar að vinna í höndunum. Fyrir tveimur árum var hún meðlimur í hönnunarhópi sem tók að sér ýmiss konar margmiðlunarverkefni og tók meðal annars þátt í pop up-markaði fyrir jólin 2015. Plaköt eftir Rakel vöktu þar mikla athygli og í kjölfarið opnaði hún vefverslunina Sker.is þar sem hún selur plakötin sín.

Saman systurnar

Nýlega opnaði hún ásamt systur sinni, Rebekku Ólafsdóttur, verslun á Langholtsvegi undir saman nafni en þar selja þær bæði hönnun Rakelar og húðvörur systur hennar undir nafninu RÓ naturals.

„Við systurnar höfum tekið að okkur ýmis skapandi verkefni saman í gegnum tíðina og hefur draumur okkar alltaf verið að opna litla verslun.

Hér seljum við vörur okkar; hönnun mína og húðvörur Rebekku, en vörur hennar handunnar úr 100% náttúrulegum hráefnum. Þær innihalda því engin óþarfa aukaefni eins og alkóhól, paraben og önnur rotvarnarefni. Ég kom einmitt að útliti húðvaranna og markaðsmálum í tengslum við þær ásamt systur minni."

Kolféll fyrir vatnslitum

Vegna mikilla anna undanfarin ár var það ekki fyrr en í fæðingarorlofi Rakelar fyrir þremur árum sem hún byrjaði að teikna aftur eftir langa pásu og kolféll hún þá fyrir vatnslitum.

„Ég er mikill dýravinur og hefur það verið einn helsti innblástur í verkum mínum eins og sjá má á nýlegum verkum. Sterkasti og eflaust þekktasti stíll minn er krotstíllinn og má þar nefna Star Wars myndirnar sem seldar voru á fyrrnefndum Pop up markaði 2015."

Krotstíllinn varð ríkjandi í verkjum hennar til að byrja með og hefur hún mjög gaman af því að vinna með þann stíl ennþá. Ásamt því að teikna og mála plaköt hefur hún einnig hannað ýmis grafísk verk.

„Yfirleitt hanna ég í settum þar sem verkin tengjast hvert öðru eða eru unnin í sama stíl og er hugmyndavinnan byggð á því. Það er mismunandi hvernig verkin eru unnin en byrjunin er hugmyndavinna, þar næst skissur og að lokum er málað, teiknað eða unnið í tölvu."

Barnahorn og kaffi

Rekstur verslunarinnar hefur gengið vonum framar fyrstu vikurnar að sögna Rakelar og er stefnan að auka vöruúrvalið jafnt og þétt og taka inn nýja íslenska hönnuði. „Við erum m.a. farnar að selja vörur frá töskuhönnuðinum Klementinu og fleiri bætast vonandi fljótlega við."

Umhverfismál skipta þær miklu máli eins og sjá má á umbúðum og öðrum pakkningum í versluninni. „Allar vörur RÓ naturals eru í glerumbúðum og er viðskiptavinum gefin kostur á að skila inn tómum krukkum og flöskum í skiptum fyrir 15% afslátt af næstu vöru."

Systurnar eru fjölskyldufólk og því er af sjálfsögðu barnahorn í versluninni og alltaf heitt á könnunni að sögn Rakelar. „Vinnuaðstaða okkar er bakatil þar sem töfrarnir gerast en þar er aðstaða til að blanda húðvörurnar og að sinna verktakavinnu í auglýsingagerð ásamt annari markaðsvinnu."

Nánari upplýsingar um hönnun og vörur þeirra Rakelar og Rebekku má finna á sker.is á facebook (SKER og RÓ naturals).