Segir sífellt fleiri lögreglumenn leita í önnur störf á sama tíma og verkefnum fjölgar

Frímann Birgir Baldursson, varaformaður Landssambands lögreglumanna, segir að lögreglumönnum á Íslandi fækki stöðugt á sama tíma og verkefnum þeirra fjölgi og verði fjölbreyttari. Hann segir lögreglumenn nú hverfa til annarra starfa. Þetta kom fram í viðtali við Frímann í útvarpsþættinum Reykjavík síðdegis í dag. 

„Við höfum orðið talsvert vör við það að undanförnu að menntaðir lögreglu menn leita út fyrir lögregluna. Þetta var áberandi á árunum fyrir hrun og er að byrja aftur núna.

Við vorum í spjalli á kaffistofunni hjá landssambandinu í gær og töldum að að minnsta kosti sex til átta fyrrverandi lögregluþjónar eru nú orðnir flugþjónar.“

Frímann segir að í flugliðastöðunni fái mennirnir betri laun og betri vinnutíma. Á sama tíma og lögreglumönnum fækki hafi námið lengst úr einu ári í tvö sem þýðir að á þessu ári komi enginn nýr lögreglumaður til starfa.

„Það verður því ekki fyrr en næsta vor sem það gerist. Í pípunum núna eru 47 manns í starfsþjálfun og maður vonar að lögregluembættið hafi burði til þess að ráða það fólk.“

En hvað þarf lögregluembættið að gera til þess að fá menn aftur til starfa?

„Það er fyrst og fremst kannski launin sem þyrfti að lagfæra. En svo er það líka álagið sem menn tala oft um sem ástæðuna fyrir að fara úr lögreglunni. Ef álagið myndi minnka þá kæmu þeir kannski til baka. En til þess að minnka álagið þarf að fjölga lögreglumönnum.

Verkefnunum fjölgar með hverju ári sem líður en lögreglumönnunum fækkar. Kröfurnar um þau verkefni sem við eigum að sinna, eru alltaf meiri og meiri.“

Hlusta má á viðtalið við Frímann í spilaranum hér að ofan.