Á annað hundrað slasaðir og tugir handteknir vegna leiðtogafundar

Hátt á annað hundrað manns hafa slasast í pústrum mótmælenda og lögreglu í vegna leiðtogafundar helstu iðnríkja heims í Hamborg og tugir manna hafa verið handteknir. Forsetar Rússlands og Bandaríkjanna hittust í fyrsta skipti á fundi í dag og sagði Trump hann og Putin hafa mikið að ræða og það væri heiður að hitta Rússlandsforseta.

Mótmælendur hafa sett upp búðir í einum almenningsgarða Hamborgar og strax í gærkvöldi streymdu þeir út á götur borgarinnar undir slagorðinu Velkomin til helvítis. Til nokkurra átaka kom í gærkvöldi og í dag þegar eldar voru kveiktir á götum úti og nokkrir bílar voru brenndir.

Lögregla hefur fengið liðsstyrk víðs vegar að í Þýskalandi og Austurríki og notaði meðal annars kröftugar vatsbyssur til að dreifa mótmælendum sem höfðu lokað götum með því að setjast þvert yfir þær til að reyna að trufla leiðtogafundinn sem stendur yfir í dag og á morgun.

Lögreglustjórinn í Hamborg sagði síðdegis að um 160 manns hefðu særst í átökum lögreglu og mótmælenda og um 60 hefðu verið handteknir og mætti búast við að þessar tölur hækkuðu.

Leiðtogar 19 helstu iðríkja heims sitja fundinn ásamt forystumönnum Evrópusambandsins og tóku þeir að streyma að fundarstaðnum í morgun. Angela Merkel kanslari Þýsklanads er í hlutverki gestgjafans og heilsaði hverjum og einum við komuna. Donald Trump Bandaríkjaforseti fundaði einslega með nokkrum leiðtogum en mest var spennan fyrir fundi hans og Vladimir Putins síðdegis.

Merkel segir verkefnin ögrandi og augljós

Nú þegar einungis eru tveir mánuðir til þingkosninga í Þýskalandi má Merkel ekki við því að sýnast gefa eftir í samskiptum við Donald Trump Bandaríkjaforseta. Hún getur heldur ekki hætt á að breikka gjána milli Evrópu og Bandaríkjanna. En leiðtogar ríkjanna reyna að fá Trump til að skuldbinda Bandaríkin á ný við Parísar samkomulagið í loftlagsmálum.

„Við þekkjum öll þau ögrandi verkefni sem blasa við í heiminum og við vitum að tíminn er naumur. Þess vegna er oft aðeins hægt að finna lausnir með málamiðlunum. Ef við nálgumst hvort annað, og ég undirstrika þetta, án þess að láta hafa of mikil áhrif á okkur,“ sagði Merkel í upphafi leiðtogafundarins.

Kanslarinn sagði umheimin vænta árangurs af fundi leiðtoganna. En mörg málanna sem liggja fyrir fundinum eru eldfim, sérstaklega umhverfismálin eftir að Trump dró Bandaríkin út úr nýgerðu Parísar samkomulagi um aðgerðir í loftlagsmálum, þar sem flestir leiðtoganna reyna að þrýsta á Donald Trump að skipta um stefnu.

„Í þessu samhengi höfum við Þjóðverjar reynt að einblína á efnahags- og viðskiptamálin en einnig á loftlagsbreytingarnar og stefnuna í orkumálum,“ sagði Merkel.

Trump ánægður með fund sinn með Putin

Trump og Putin hafa áður ræðst við í síma eftir að Trump tók við forsetaembættinu í janúar en þeir hittust í fyrsta skipti í dag. Ríkin hafa greint á um stefnu Rússa gagnvart Sýrlandi og Íran, innlimun Rússa á Krímskaga og hernaðarleg afskipti þeirra í austurhluta Úkraínu og svo er eldfimasta málið ef til vill meint afskipti Rússa af bandarísku forsetakosningunum.

Vel fór á með forsetunum í upphafi fundar og sagði Trump að það væri ánægjulegt að hitta Putin.

„Putin forseti og ég höfum rætt ýmislegt og ég tel að það gangi allt vel. Við höfum átt mjög svo góðar samræður. Við munum ræða saman núna og augljóslega munu þær viðræður síðan halda áfram. En okkur hlakkar til að margt jákvætt gerist., fyrir Rússland, Bandaríkn og alla sem málin snerta. Og það er heiður að vera hér með þér, þakka þér fyrir,“ sagði Trump í ipphafi fundar forsetanna og tók innilega í hönd Putins án þess að reyna í þetta skipti að kippa hönd hans að sér eins og hann hefur oft gert þegar hann heilsar fólki.