Bílaleigubransinn vex landbúnaði yfir höfuð

Fari sem horfir mun bílaleigubransinn vaxa landbúnaði yfir höfuð sé litið til veltu á þessu ári. Hún stefnir nú í 54 milljarða sem er nokkru hærra en landbúnaður á Íslandi veltir.

Böðvar Þórisson, skrifstofustjóri fyrirtækjasviðs Hagstofu Íslands, vekur athygli á þessari staðreynd á Facebook-síðu sinni og birtir þar athyglisvert línurit sem snýr að þessu og sýnir þróunina glögglega.

Böðvar vekur jafnframt athygli á því að umferð á vegum í júní, um hringveginn, „var rúmlega 12% meiri en júní í fyrra og aldrei hefur verið meiri vöxtur í umferð á milli ára. Fjöldi þeirra sem fóru um vopnaleit á leið úr landi var 20% meiri í júní 2017 en 2016 og á árinu er 39% aukning frá fyrra ári,“ segir Baldur og spyr: „Var einhver að segja þér að það sé ekkert að gerast og allt stopp og þá sérstaklega úti á landi?“

Sé litið til mismunandi landshluta þá hefur á umliðnum 5 árum umferð vaxið um 100 prósent á Austurlandi, 50 prósent á Norðurlandi, Suðurlandi um 60 prósent, 40 prósent á Vesturlandi og á höfuðborgarsvæðinu um ein 35 prósent.