FH-ingar fara til Portúgals í umspilinu

FH mætir portúgalska liðinu Braga í umspili um sæti í riðlakeppni Evrópudeildarinnar. Dregið var í umspilið í höfuðstöðvum UEFA í Nyon í Sviss í morgun.

Auk Braga átti FH möguleika á að mæta Athletic Bilbao, Everton, Salzburg og Midtjylland.

Fyrri leikurinn fer fram hér á landi 17. ágúst. Viku síðar mætast liðin svo á Estádio Municipal de Braga, heimavelli Braga sem endaði í 5. sæti portúgölsku úrvalsdeildarinnar á síðasta tímabili.

Everton mætir Hadjuk Spilt frá Króatíu og AC Milan mætir Shkëndija frá Makedóníu.

Matthías Vilhjálmsson og félagar í Rosenborg mæta Ajax, silfurliði Evrópudeildarinnar á síðasta tímabili.

Viðar Örn Kjartansson og félagar hans í Maccabi Tel-Aviv etja kappi við Altach frá Austurríki.

AEK, sem Arnór Ingvi Traustason leikur með, mætir Club Brügge frá Belgíu.

Dráttinn í heild sinni má sjá með því að smella hér.