Alli íhugar að skipta um umboðsmann og vill fá miklu hærri laun

Dele Alli, leikmaður Tottenham og enska landsliðsins, íhugar nú að skipta um umboðsmann samkvæmt heimildum Daily Mail.

Alli fær „aðeins“ 60.000 pund í vikulaun hjá Tottenham og veit að hann getur fengið miklu hærri laun annars staðar. Alli vill fá a.m.k. þrefalt hærri laun næsta sumar að því er fram kemur í frétt Daily Mail.

Litlar líkur eru á því að Tottenham sé tilbúið að hækka laun Allis svona mikið en Spurs borgar frekar lág laun miðað við hin félögin í efri hluta ensku úrvalsdeildarinnar.

Manchester-félögin City og United og Chelsea hafa áhuga á hinum 21 árs gamla Alli sem er þó spenntari fyrir því að spila utan Englands.

Alli kom til Tottenham frá MK Dons 2015. Hann sló í gegn á sínu fyrsta tímabili með Spurs þar sem hann skoraði 10 mörk og var valinn besti ungi leikmaður ensku úrvalsdeildarinnar.

Í fyrra skoraði Alli 22 mörk í öllum keppnum og var aftur valinn besti ungi leikmaðurinn í ensku úrvalsdeildinni.