Skoða stækkun typpa í skíðastökki

Þýski miðillinn Bild greindi frá því í janúar að skíðastökkvarar væru farnir að sprauta hýalúronsýru í reður sinn og stækka hann, með það í huga að mega þá klæðast örlítið stærri keppnisbúningi.

Stærra typpi getur þannig skipt sköpum, til dæmis á Vetrarólympíuleikunum sem eru að hefjast, því stærri búningur hjálpar mönnum að stökkva örlítið lengra.

„Hver einasti aukasentímetri á búningnum skiptir máli. Ef að búningurinn er 5% stærri að flatarmáli þá flýgur maður lengra,“ sagði Sandro Pertile, mótastjóri hjá alþjóða skíðasambandinu, við BBC en strangar reglur gilda um hve þröngir búningarnir eiga að vera.

Olivier Niggli, forstjóri WADA, var spurður út í stóra typpamálið á blaðamannafundi í Mílanó í dag og virtist vissulega hafa nokkuð gaman af vangaveltunum.

„Ég þekki ekki hvernig smáatriðin eru í skíðastökki og hvernig þetta gæti hjálpað til við að ná árangri,“ sagði Niggli.

„Ef eitthvað kemur upp á yfirborðið þá skoðum við það og þá hvort þetta tengist ólöglegri lyfjanotkun. Við tökum ekki á öðrum aðferðum [en ólöglegri lyfjanotkun] til að ná árangri,“ sagði Niggli.

Enginn hefur verið nafngreindur, grunaður um að nota þær aðferðir sem Bild lýsti, og Sky Sports segir skíðastökkvara hafa alfarið hafnað því að þær séu notaðar.

Það er hins vegar ljóst að öllum brögðum er beitt til þess að ná sem mestum árangri í greininni og skemmst að minnast þess þegar Norðmenn urðu uppvísir að svindli á HM í fyrra, með því að eiga við búninga sinna keppenda.