Veiðar á norsk-íslenski síld hafnar

Veiðar á síld úr norsk-íslenska síldarstofninum eru hafnar af krafti og er veiðin sögð fara vel af stað. Fram kemur í frétt á vef HB Granda að lokið hafi verið að vinna síðasta makrílfarm Víkings AK hjá uppsjávarfrystihúsi Granda á Vopnafirði um síðustu helgi. Nú sé það hins vegar vinnsla á síld sem allt snýst um í bæjarfélaginu.

„Við erum nú í þriðja hreina síldartúrnum en í þeim tveimur fyrri vorum við með 900 og 1.000 tonna afla. Þetta lítur vel út að öðru leyti en því að það er búin að vera ótíð á miðunum. Gærdagurinn nýttist skipunum ekki og það lægði ekki fyrr en í morgun. Svo á aftur að hvessa með kvöldinu þannig að tíðarfarið er ekki beinlínis hagstætt,“ er haft eftir Guðlaugi Jónssyni, skipstjóra á Venusi NS, á vef HB Granda. Skipum hefur fjölgað á miðunum síðustu dagana enda eru mörg skipanna búin með makrílkvótann.

Í sömu frétt segir Magnúsar Róbertssonar, vinnslustjóra HB Granda á Vopnafirði, að síldin sé fínasta hráefni. „Þetta er mjög góð síld og meðalvigtin hefur verið um 350-360 grömm. Það var ekkert mál að skipta yfir í síldarvinnsluna. Við erum með flokkara fyrir síld og makríl uppsetta og vinnslulínan er sú sama,“ segir Magnús sem hann vonast til að vinnsla á norsk-íslenskri síld dugi húsinu næstu þrjár vikurnar.