Gagnrýnir þá sem ekki vilja ræða kostnað við hælisleitendur

Ásmundur Friðriksson, þingmaður og frambjóðandi Sjálfstæðisflokksins, telur að ræða þurfi kostnað vegna hælisleitenda. Í grein sinni, sem birtist í Morgunblaðinu í morgun, segir Ásmundur umræðu um kostnað í málaflokknum hafa verið þaggaða niður. Þá segir hann heimafólk líða fyrir fjölgun hælisleitenda á Íslandi.

Hver hælisleitandi „kostar þjóðarbúið um 3,8 milljónir króna á ári“

„Ef ítrustu spár ganga eftir gætu þeir orðið allt að 2000 á þessu ári,“ segir Ásmundur um fjölgun í komum hælisleitenda hingað til lands. Ásmundur segir þessa fjölgun koma í kjölfar „ákvörðunar Alþingis um að taka hagsmuni einstaklinga fram yfir heildarinnar.“ Þá segir hann alvarlegar sviðsmyndir hafa verið settar fram um stóraukna fjölgun hælisleitenda til Íslands, sem hefðu alvarlegar afleiðingar.

„Það myndi setja heilbrigðiskerfið í afar þrönga stöðu, húsnæðismarkaðurinn mundi springa og kostnaðurinn gæti orðið allt að 220 milljarðar króna. En hver hælisleitandi kostar þjóðarbúið um 3,8 milljónir króna á ári. En þegar kemur að þessum kostnaðarlið hefur umræðan verið þögguð niður.“

Nábýlið við suma hælisleitendur svo eldfimt að kalla þarf á sérsveit

Ásmundur gagnrýnir enn fremur stjórnmálaflokka sem vilja ekki ræða kostnað við fjölgun hælisleitenda hér á landi.

„Þeir stjórnmálaflokkar sem tala fyrir því að lækka hér þröskuldana svo hælisleitendum verði gert auðveldara að koma til Íslands en annarra landa vilja ekki ræða kostnaðinn við málaflokkinn. Þeir líta á það sem áskorun að taka á móti þúsundum, jafnvel tugþúsundum hælisleitenda með algjörlega ófyrirséðum afleiðingum fyrir innviði heilbrigðiskerfisins og húsnæðismarkaðinn,“ skrifar Ásmundur.

Um þessar afleiðingar af fjölgun hælisleitenda segir Ásmundur að þeirra gæti nú þegar og að kostnaður stefni í sex þúsund milljónir í ár, og kominn langt umfram fjárheimildir. Þá ber hann saman stöðu „heimafólks“ og hælisleitenda.

„Þrengingar eru á húsnæðismarkaði. Heimafólk er sett á götuna á meðan margar íbúðir, gistiheimili og gamlir skólar eru setin hælisleitendum. Nábýlið við suma þeirra er svo eldfimt að það dugar ekki minna en sérsveit lögreglunnar ef stilla þarf til friðar.“

Hælisleitendur fái betri framfærslu en eldri borgarar og öryrkjar

Þá spyr Ásgrímur hvers vegna ekki megi bera saman kostnað við hælisleitendur og framlög til heilbrigðiskerfisins eða framfærslu eldri borgara. Hann segir hælisleitendur til að mynda fá „í mörgu betri framfærslu“ en eldri borgarar og öryrkjar, til að mynda frítt húsnæði og ókeypis sálfræði-, læknis- og tannlæknaþjónustu þegar eldri borgurum og fötluðum stendur það ekki til boða.

Frumvarp um tvö bráðabirgðaatkvæði um stöðu barna, sem sótt hafa um alþjóðlega vernd, voru samþykkt á lokadegi þings nú í september. Þessum börnum var þannig gefið aukið svigrúm til endurupptöku máls síns og dvalar á Íslandi. Þingmenn Sjálfstæðisflokksins, flokks Ásmundar, greiddu atkvæði gegn frumvarpinu.

Annað hvort tekin verkjalyf við tannpínu eða tennurnar dregnar út

Brynhildur Bolladóttir, upplýsingafulltrúi Rauða kross Íslands, birti pistil á Kjarnanum í byrjun september síðastliðnum. Tannlæknaþjónustu hælisleitenda sagði hún felast í tveimur valkostum.

„Ann­að­hvort taka verkja­lyf við tann­pínu eða láta draga úr sér tenn­urn­ar. Í und­an­tekn­ing­ar­til­vikum er gert við tennur í börnum þjá­ist þau af tann­pínu.“

Þá sagði Brynhildur í samtali við RÚV í dag að hælisleitendur fengju húsnæði í formi herbergja og oft deili þar nokkrir sama herbergi. Hún lagði enn fremur áherslu á að ekki sé víst að aldraðir eða öryrkjar vilji sömu úrræði og standi hælisleitendum til boða og taldi það auk þess varasamt að stilla einum hóp fólks upp á móti öðrum.

Hælisleitendur voru 1132 í fyrra og í lok síðasta mánaðar höfðu 883 sótt um hæli hér á landi það sem af er ári. Umsóknum um hæli á Íslandi hefur fjölgað mjög undanfarin ár.

Grein Ásmundar Friðrikssonar má sjá í heild sinni hér að neðan.