Everton ætlar að stela stjóranum hans Jóa

Samkvæmt heimildum Sky Sports þá ætla forráðamenn Everton að freista þess að fá stjóra Burnley, Sean Dyche, til félagsins.

Sky segir að Everton ætli í viðræður við Burnley á næstu 24 tímum.

Það er rúm vika síðan Everton rak Ronald Koeman sem stjóra félagsins og David Unsworth hefur verið að leysa hann af síðan í von um að fá starfið út leiktíðina hið minnsta.

Sam Allardyce er á meðal þeirra stjóra sem hafa sýnt starfinu áhuga en Dyche er maðurinn sem Everton vill fá.

Dyche gæti því farið frá því að vera stjóri Jóhanns Bergs Guðmundssonar í að vera stjórinn hans Gylfa Þórs Sigurðssonar. Dyche var spurður út í Everton eftir 1-0 sigur Burnley á Newcastle í gær.

„Ég held bara áfram að vinna mína vinnu. Það er ekkert flóknara en það,“ sagði Dyche sposkur.