Skattrannsóknarstjóri hyggst kæra niðurstöðu héraðssaksóknara

Skattrannsóknarstjóri segir ákvörðun héraðssaksóknara um að fella niður tugi mála sem embættið hafði til rannsóknar, ekki hafa góð áhrif á önnur mál sem eru í vinnslu. Niðurstaða héraðssaksóknara verður kærð í einhverjum málanna.

Í Fréttablaðinu í dag er greint frá því að Héraðssaksóknari hefur fellt niður rúmlega sextíu mál af hundrað fimmtíu og tveimur sem skattrannsóknarstjóri hafði vísað til embættisins eftir rannsókn á gögnum meðal annars Íslendinga með fjármuni í skattaskjólum.

Skattstofnarnir sem um ræður námu tæplega tíu milljörðum og varða flest þeirra sjómenn sem störfuðu hjá íslenskum útgerðum erlendis. Tæpan fjórðung að þeim tíu milljörðum sem um ræðir, eða tveir komma tveir milljarðar á einstaklingur sem vantaldi tekjur og fjármagnstekjur. Málin ná yfir tímabilið 2012 til 2016.

Ólafur Þór Hauksson, héraðssaksóknari segir að litið hafi verið til dómafordæma við ákvörðunina og vísar hann í niðurstöðu Mannréttindadómstóls Evrópu í máli Jóns Ásgeirs Jóhannessonar og Tryggva Jónssonar þegar íslenska ríkið var dæmt fyrir að brjóta á þeim þegar Hæstiréttur dæmdi þá fyrir skattalagabrot árið 2013.

Niðurstaðan blóðtaka

Þá var einnig litið til dóms varðar mál Braga G. Kristjánssonar, sem dæmdur var fyrir meiriháttar skattalagabrot í héraðsdómi, en Hæstiréttur ákvað að fresta máli hans á meðan beðið væri eftir dómi Mannréttindadómstólsins.

Skattrannsóknarstjóri segist hafa vitað að einhver málanna yrðu felld niður en segir niðurstöðuna blóðtöku fyrir embættið.

Þetta er tæplega helmingur þeirra mála sem þið hafið sent til héraðssaksóknara. Þetta hlýtur að hafa áhrif á þau störf sem fara fram hjá skattrannsóknarstjóra.

„Það er nú auðvitað einn anginn af þessu, að þetta hafi áhrif á móralinn, viljann og slíkt, eðli málsins samkvæmt, en við höldum ótrauð áfram og þetta er eitthvað sem við verðum að vinda ofan af og svo koma aðrir tímar,“ segir Bryndís Kristjánsdóttir, skattrannsóknarstjóri.

Ólafur Þór Hauksson, héraðssaksóknari sagði í samtali við fréttastofu í dag að ekki út séð með hvort fleiri mál yrðu felld niður.

„Mér heyrist nú að það verði eitthvað í viðbót en ég held að þetta sé nú, vona ég að minnsta kosti og ætlað, að þetta sé megin þorrinn,“ segir Bryndís.

Er eitthvað sem hægt er að gagnrýni í þeirri málsmeðferð sem hefur verið í þessum málum frá því þau komu upp?

„Ég held að menn hafi misjafna sýn á meðferðina í heild sinni en ég held að allir hafi séð fyrir að þetta yrði með einhverju hætti að einhver hópur þessara mála færi þessa leiðina,“ segir Bryndís.