Ljómandi, hraust og fögur húð

Húðin verður unglegri, áferðarfegurri, hraustlegri og fylltari eftir dekur, laser-meðferð og upplyftingu hjá húðmeðferðarstöðinni HÚÐIN skin clinic. Þar er hægt að öðlast einkar fagurt og frísklegt útlit fyrir jólin.

„Ég hef alltaf haft mikinn áhuga á húðinni. Hún er stærsta líffærið og endurspeglar oft og tíðum lífsreynslu okkar,“ segir Lára G. Sigurðardóttir, læknir og annar eigandi húðmeðferðarstöðvarinnar HÚÐIN skin clinic sem opnuð hefur verið í glæsilegu húsnæði í Hátúni 6b. Meðeigandi hennar er Sigríður Arna Sigurðardóttir, hjúkrunar- og snyrtifræðingur, en báðar hafa vottun fyrir öllum meðferðum sem í boði eru.

Í HÚÐIN skin clinic er lögð áhersla á fyrirbyggjandi þætti og boðið upp á meðferðir sem auka hreysti húðarinnar.

„Við fæðumst öll með mismunandi húð. Sumir njóta þess að hún helst slétt og fín ævina út eða eru sáttir við húðbreytingar sem koma með tímans rás, á meðan aðrir glíma við húðkvilla og fá snemma línur. Því er gott að huga að forvörnum þegar stoðvefir húðarinnar fara að slakna og framleiðsla kollagens minnkar, því það er erfiðara að laga ör og línur þegar þær eru orðnar mjög djúpar. Því fyrr sem maður byrjar að hugsa vel um húðina, því betur eldist hún,“ segir Lára.

Hægja á öldrun húðarinnar

Húðin byrjar að missa styrkleika sinn og teygjanleika um þrítugt.

„Hægt er að hægja á því ferli með margs konar meðferðum,“ segir Sigríður sem hefur um árabil kynnt sér þekkingu á því hvað hægt er að gera til að viðhalda heilbrigði og styrkleika húðar án þess að fara í lýtaaðgerðir.

„Við getum hægt á öldrun húðarinnar og lagað ýmsar húðbreytingar með náttúrulegum lausnum sem hægt að nota saman eða einar og sér. Þannig getum við fjarlægt eða minnkað mikið hár­æðaslit, ör og slit, rósroða, bólur, litabreytingar, sólarskemmdir, aldursbletti og fínar sem djúpar línur í andliti,“ upplýsir Sigríður.

Á HÚÐIN skin clinic er einnig veitt húðslípun, húðþétting, húðlyfting, háreyðing og húðflúreyðing.

„Við erum líka með fjölbreyttar Dermapen-meðferðir sem er einföld og þægileg leið til að örva og byggja upp þá stoðvefi húðarinnar sem tapast hratt þegar við eldumst og getur lagað örvefsmyndun eftir bólur.“

Lára segir öldrun húðar einkennast af fínum og djúpum línum, litabreytingum í húð, háræðasliti, minni teygjanleika og því að húðin tapar þéttleika sínum og verður líflausari.

„Þetta gerist vegna ytri og innri ástæðna. Útfjólubláir geislar sólar og ljósabekkja eru einn best þekkti öldrunarvaldurinn. Þeir skemma erfðaefni fruma og takmarka getu húðarinnar til að endurnýja sig. Reykingar verða líka til þess að húðin eldist hraðar og takmarka súrefnisflutning til hennar. Streita getur hraðað öldrun húðarinnar, minnkar þykkt ysta lags húðar og magn bandvefsfruma sem framleiða kollagen, ásamt því að geta aukið bólumyndun.“

Einnig hefur verið sýnt fram á að svefnskortur geti flýtt fyrir öldrunareinkennum húðar, eins og fínum línum, litabreytingum í húð og minni teygjanleika.

„Við vitum að djúpsvefninn er mikilvægur fyrir framleiðslu vaxtarhormóna sem hjálpa okkur að endurnýja líffærin, þar á meðal húðina. Hreyfing og útivera hafa síðan jákvæð áhrif svo lengi sem við verndum húðina fyrir miklum kulda og sól. Maður er sjaldan jafn hraustlegur á að líta og eftir góða útiveru.“

Ókeypis húðráðgjöf

Fagmennska og góð þjónusta er í fyrirrúmi í HÚÐIN skin clinic. Hægt er að sækja ókeypis ráðgjöf um forvarnir og meðferð húðvandamála.

„Húðin þarf næringarefni til að endurnýja sig og því gott að borða mikið af ávöxtum, grænmeti og hnetum til að tryggja að við fáum nóg af C-vítamíni (appelsínur, greip og kíví), E-vítamíni (avókadó, möndlur og haframjöl), A-vítamíni og beta-karótíni (gulrætur, sætar kartöflur, grænkál) og selen (brasilíuhnetur, fiskur, kjöt og egg). Þá eru Omega 3-fitusýrur mikilvægar til að gera við húðina, gefa henni raka og teygjanleika. Matur sem inniheldur ríkulega af Omega 3-fitusýrum er feitur fiskur (lax, sardínur), valhnetur og svo er hægt að taka þær inn sem fæðubótarefni, en mér hefur þótt kaldpressuð fiskiolía þolast best,“ segir Lára og bætir við sinki sem er einnig mikilvægt í uppbyggingu húðar. Fæða sem inniheldur sink er til dæmis kjöt, ostar, egg, skelfiskur og heilkorn.

Lára og Sigríður leggja áherslu á hvað við getum sjálf gert til að viðhalda fallegri og unglegri húð.

„Góð krem með næringarefnum eru gagnleg og rannsóknir sýna að inntaka kollagens getur hjálpað við að auka og byggja upp kollagen í húðina,“ útskýrir Lára.

Andlitsæfingar séu líka mikilvægar forvarnir.

„Ef húðin er farin að slappast á hálsinum er hægt að gera æfingar sem styrkja platysma-vöðvann. Við æfum gjarnan líkamann, en ef við viljum styrkja andlitið þurfum við einnig að æfa andlitsvöðvana. Andlitsbeinin visna og hrörna með árunum en við getum unnið á móti afleiðingum þess með því að gera andlitsæfingar, stækka andlitsvöðvana og það gefur húðinni auka fyllingu,“ segir Lára.

Freistandi opnunartilboð

Lára og Sigríður leggja áherslu á náttúrulegar meðferðir.

„Velflestir sjá stóran mun, oft strax eftir fyrstu meðferð, og við finnum að viðskiptavinir eru þakklátir og að þetta hefur mikið að segja, enda fylgir oft ákveðin vellíðan því að líta vel út.“

Fjölmargar nýjar og dugandi lausnir hafa litið dagsins ljós í húðmeðferðum.

„Öll fylliefni sem við notum innihalda náttúrulegar sykrur sem sprautað er undir neðsta lag húðarinnar, gefa henni aukinn raka og grynnka línur með þeim árangri að húðin verður áferðarfegurri og unglegri,“ útskýrir Lára. „Þessi sama sykra fyrirfinnst náttúrulega í líkamanum, til dæmis í húð, liðvökva og brjóski, en oft er talað um hana sem náttúrulegt rakaefni líkamans. Framleiðendur lofa sex mánaða til eins árs endingu en vegna þess að efnið örvar framleiðslu kollagens á þessum svæðum höfum við séð árangur endast mun lengur.“

Lasertækin sem HÚÐIN Skin Clinic notar í meðferðirnar eru af nýjustu gerð á sínu sviði.

„Við leggjum mikla áherslu að fagmennsku. Fylliefni Restyleline fara öll í gegnum strangt eftirlitsferli og við höfum sótt námskeið á meðferðartækin sem eru öll viðurkennd. Hægt er að panta ráðgjöf við val á meðferðum, fólki að kostnaðarlausu. Við stefnum á að vera með tilboð í hverjum mánuði á einhverri meðferð, svo það er um að gera að fylgjast með. Verðunum stillum við mjög í hóf og bjóðum 20 prósenta afslátt á opnunartilboði og freistandi gjafabréf fyrir jólin.“

HÚÐIN Skin Clinic er í Hátúni 6b. Sími 783 2233. Einnig er hægt er að bóka tíma á Facebook, undir Húðin og í tölvupósti á hudin@hudin.is