Sala nýrra fólksbíla orðin meiri en fyrir hrun

Fleiri en tuttugu þúsund fólksbílar hafa verið nýskráðir á Íslandi það sem af er þessu ári og er það meira en þegar mest lét fyrir bankahrun. Um helmingur nýskráninganna er á bílaleigubílum.  Framkvæmdastjóri Bílgreinasambandsins segir verð á nýjum bílum hagstætt kaupendum um þessar mundir.

Mikil samkeppni er nú sögð ríkja á milli bílasala um kaupendur. Özur Lárusson, framkvæmdastjóri Bílgreinasambandsins, segir að lækkað verð á nýjum bílum skýri að hluta hvers mikil salan hefur verið á árin.

Verð á notuðum bílum hafi einnig farið lækkandi. Eftir hrunið 2008 segir Özur að gat hafi myndast í bílamarkaðinn á Íslandi. Meðalaldur bíla hafi orðið mjög hár, allt upp í tólf ár. Haldi aukning í sölu nýrra bíla áfram gæti það haft áhrif á markaðinn með notaða bíla.

„Notaði markaðurinn er yfirleitt aðeins seinni heldur en nýir bílar að lækka í verði en það er komið núna. Verðmyndunin á bílum er komin þangað sem gerðist í upphafi árs á nýjum bílum, það er að segja, notaðir bílar hafa lækkað,“ segir Özur.

Hann gerir ráð fyrir að ástandið á markaðnum verði svipað á næsta ári. Sala til einstaklinga eigi enn töluvert inni vegna þess hversu hátt hlutfall nýskráðra bíla séu á vegum bílaleigna.