Greinilegt er að Írafár á enn dyggan aðdáendahóp því uppselt er á tuttugu ára afmælistónleika sveitarinnar í Hörpu 2. júní á næsta ári. Voru viðtökurnar við tónleikunum svo góðar að bætt var við öðrum tónleikum seinna sama kvöld.
Lífið ákvað því að kíkja í minningakistuna og grafa upp hluti sem fólk er kannski búið að gleyma á farsælum ferli Birgittu.
1. Byrjaði allt á Broadway
Birgitta er frá Húsavík, fædd 28. júlí árið 1979. Hún tók þátt í tónlistarbylgjunni í kringum áramótin 2000 þar sem tónlistarmenn af landsbyggðinni gerðu allt vitlaust í poppsenunni.Birgitta vakti fyrsta athygli fyrir sönghæfileika sína í keppninni Stjörnur morgundagsins sem fór fram á Hótel Íslandi árið 1996, þá aðeins sautján ára gömul. Þar vakti hún mikla lukku og komst í undanúrslit, en meðal keppenda í hæfileikakeppninni voru Game Tíví-gúrúinn Ólafur Þór Jóelsson og söngkonan Soffía Sigríður Karlsdóttir.
Í framhaldinu fékk Birgitta stór söngverkefni, til dæmis í ABBA-sýningu á Hótel Íslandi sem var gríðarlega vinsæl. Meðal annarra stjarna sem tóku þátt í því verkefni voru Jónsi í svörtum fötum og Eurovision-farinn Kristján Gíslason.
2. Flétturnar frægu
Það má segja að árið 2003 hafi verið eitt það stærsta á ferli Birgittu. Hún var til að mynda valin söngkona ársins og kynþokkafyllsti popparinn á Hlustendaverðlaunum FM957 og poppstjarna ársins á Íslensku tónlistarverðlaununum. Þá var hún í öðru sæti í vali um kynþokkafyllstu konuna á RÁS2, á eftir sjónvarpskonunni, og nú aðstoðarkonu Bjarna Benediktssonar, Svanhildi Hólm. Reyndar var staðan í valinu eins árið 2004.Og svo má ekki gleyma því að Birgitta fór fyrir Íslands hönd í Eurovision þetta ár með lagið Open Your Heart, eða Segðu mér allt. Birgitta stóð sig með sóma í Riga í Lettlandi og endaði í áttunda sæti.
Um þetta leyti var einnig skrifað mikið um tísku og fatasmekk Birgittu, og var hún meðal annars talin hafa haft þau áhrif að fléttur komust aftur í tísku.
3. Siv, Jóhannes í Bónus eða Birgitta?
Árið 2004 gerðist það svo að sérstök Birgittu dúkka, í Bratz-anda, var sett á markað. Dúkkan var framleidd í Kína og seld í Hagkaupum.Salan gekk ekki sem skyldi og fór dúkkan í massavís á útsölu tveimur árum seinna. Þá var verðið á dúkkunni fimm hundruð krónur en var upphaflega verðlögð á tæplega fjögur þúsund krónur.
Þessa frammistöðu dúkkunar er hugsanlega hægt að rekja til þess að það var mál manna að Kínverjarnir hefðu staðið sig illa í að apa eftir andliti Birgittu. Töldu sumir á þessum tíma að dúkkan væri líkari Siv Friðleifsdóttur og Jóhannesi í Bónus en Birgittu sjálfri. Birgitta var sammála því að dúkkan líktist henni ekki, þó hún talaði eilítið undir rós í viðtali við DV í nóvember 2004.
„Það er örugglega ekki einfalt að gera nákvæma eftirmynd af fólki,“ sagði hún.
4. Eftirsótt ætt
Sama ár og Birgittu-dúkkan var sett á markað, árið 2004, gafst almenningi möguleiki á að fletta upp á Íslendingabók á netinu og rekja ættir sínar.
Margir notuðu síðuna til að kanna hvort þeir væru skyldir frægum Íslendingum og kemur kannski ekki á óvart að mest var leitað af skyldleika við Birgittu nokkra Haukdal, eins og sagt var frá í DV í apríl 2005.
Næstir á eftir henni í röðinni voru Bubbi Morthens og Björgúlfur Guðmundsson.
5. Hannaði debetkortið sjálf
Og út af því að frægðarsól Birgittu virtist bara rísa og rísa, var hún fengin á allar mögulegar og ómögulegar uppákomur til að kynna hinar ýmsu vörur og þjónustu fyrirtækja.Dæmi um þetta eru persónugerðu debetkortin, sem fyrir löngu eru gleymd og grafin. Þau voru þannig úr garði gerð að eigendur debetkorta gátu hannað kortin sjálfir með myndum úr eigin safni eða úr myndabanka. Kortin voru frumsýnd árið 2005 og hver fékk fyrsta kortið? Jú, Birgitta Haukdal.
