Fengu sér húðflúr hjá 100 ára listakonu

„Þessi aðferð er mun sársaukaminni en sú með venjulegri tattúbyssu, þrátt fyrir að hún líti út fyrir að vera verri,“ segir Árni Guðmundsson en hann og kærasta hans, Kristín Inga Elísdóttir, fengu sér nýverið húðflúr frá goðsagnakenndu filippseysku húðflúrlistakonunni Whang-od Oggay eftir að hafa rekist á filipps­eyskan mann sem sagði þeim söguna af henni. Whang-od Oggay er 100 ára.

Árni segir upplifunina í kringum það að fá húðflúr hjá henni hana verið magnaða. „Ferðalagið til hennar var stórkostleg upplifun eitt og sér. Ferðalagið samanstóð af tveggja daga rútuferð frá höfuðborginni Maníla, þriggja tíma ferð uppi á rútuþaki með stórkostlegu útsýni yfir hrísgrjónaakra og á endanum fjallgöngu upp í þorpið hennar, Buscalan,“­ útskýrir Árni.

Þegar Árni og Kristín voru komin í þorpið þar sem Whang-od býr fengu þau tíma til að hvílast. „Við gistum þar á gólfinu hjá einni fjölskyldunni þarna og drukkum bjór með heimamönnum. Daginn eftir fengum við svo að hitta Whang-od. Hún talar bara ættbálkstungumál þannig að samskipti voru erfið. En það var túlkur á staðnum og hún sagði túlkinum að henni þætti íslenski vegvísirinn, sem ég er með flúraðan á mig, fallegur.“

Spurður út í hvernig aðferð Whang-od noti til að húðflúra fólk segir hann: „Nálin sem hún notar er af sítrónutré og blekið er aska af brenndu tré. Síðan notar hún spýtur til að beita nálinni,“ segir Árni sem þótti gaman að upplifa stemninguna sem ríkti.



Aðspurður hvort hann viti um aðra Íslendinga sem hafi fengið húðflúr hjá Whang-od segir Árni:

„Ég veit ekki um neinn sem hefur farið til hennar. Og nú fer hver að verða síðastur því aðhún er að verða 101 árs.“