Karl Wernersson skilaði rangri skatt­skýrslu um aflandsfélag

Skattframtalning Karls Wernerssonar vegna aflandsfélags síns Dialog Global Investment Ltd. (DGI), sem skráð var á Bresku Jómfrúaeyjum, var ekki í samræmi við lög. Þetta er niðurstaða yfirskattanefndar (YSKN).

Mál Karls hófst með rannsókn skattrannsóknarstjóra á haustmánuðum 2011. Tilefni rannsóknarinnar var bréf frá ríkisskattstjóra þess efnis að Karl lægi undir grun um skattsvik.

Rannsókn skattrannsóknarstjóra leiddi í ljós að „svo virtist sem félagið DGI hefði einvörðungu verið stofnað í skattasniðgönguskyni í þágu eiganda“. Í lokakafla skýrslunnar kemur fram að Karl hefði staðið skil á efnislega röngum framtölum fyrir tekjuárin 2005-2008. Rúmlega 1,1 milljarður króna frá félaginu hefði ranglega verið talinn fram sem arður en ekki sem tekjur. Þá hefðu rúmlega 327 milljóna vaxtatekjur af láni Karls til félags í eigin eigu ekki verið getið. Þá hefði Karl ekki skilað tekjuskatti af 739 milljóna hagnaði af sölu í hlutabréfum í Actavis.

Ríkisskattstjóri endurákvarðaði opinber gjöld Karls fyrir tímabilið í samræmi við niðurstöður skýrslunnar að viðbættu 25 prósent álagi vegna rangra skila. Sú niðurstaða var kærð til YSKN. Nefndin staðfesti niðurstöðu Ríkisskattstjóra að hluta en nefndin féllst á kröfu Karls um að fella niður 739 milljóna söluhagnað vegna bréfa í Actavis þar sem það hefði verið Dialog Global Investment Ltd. sem stóð í viðskiptunum en ekki Karl sjálfur. Dráttarvaxta- og málskostnaðarkröfu Karls var hafnað.

Úrskurður yfirskattanefndar var kveðinn upp fyrir jól en birtur fyrir helgi. Persónuupplýsingar hafa verið felldar úr honum en tilkynningar frá DGI til Kauphallarinnar koma heim og saman við upplýsingar í úrskurðinum.

„Þetta er jákvætt að því leyti að það er felld úr gildi heilmikil álagning vegna söluhagnaðar en við höfum farið fram á endurupptöku hjá YSKN vegna milljónanna 1.150 sem nefndin taldi laun en ekki arð,“ segir Jón Elvar Guðmundsson, lögmaður Karls.

Jón segir að í upphafi hafi málið verið skoðað hvort DGI hefði haft rekstrarheimildir til að greiða út arð. Lögð hafi verið fram gögn úr ársreikningum og upplýsingar af bankareikningum. Hjá YSKN hafi hins vegar verið deilt um hvort fyrir hafi legið ákvörðun um heimild til arðsúthlutunar.

„Í skýrslu skattrannsóknarstjóra lá fyrir umboð Karls til að taka ákvörðun um úthlutun arðs fyrir félagið. Hann taldi félagið fram og lagði fram upplýsingar sem sýna fram á að allar forsendur fyrir arðsúthlutun voru fyrir hendi. Á þeim grundvelli höfum við farið fram á endurupptöku á málinu hjá YSKN,“ segir Jón.

Hvað ákvörðun um vaxtagróðann varðar segir Jón það ýmsum vanköntum háð að reyna að grafa upp upplýsingar um það enda áratugur liðinn frá atvikum málsins. Reynt verði að finna gögn sem sýna fram á að greiðslurnar hafi ekki farið til Karls heldur til upphaflegs lánveitanda.