Lineker sagði nei við Chelsea: „Er of lítill“

Chelsea er á höttunum eftir nýjum framherja, en Englandsmeistararnir eru í fjórða sæti ensku úrvalsdeildarinnar og eru langt á eftir liðunum í kringum sig í markaskorun.

Miðað við orðróma síðustu daga er Roman Abramovich, eigandi Chelsea, orðinn nokkuð örvæntingafullur og vill taka við hverju sem er. Andy Carroll hefur verið sterklega orðaður við félagið og er Chelsea sagt hafa lagt inn formlega beiðni til West Ham og spurt um stöðu mála hjá framherjanum.

Þá komu þær fréttir í gær að Peter Crouch væri á óskalista Chelsea sem og Edin Dzeko. Allir þrír fullkomlega frambærilegir framherjar, en kannski ekki menn sem flestir tengja við Englandsmeistarana enda komnir á seinni enda ferilsins.

Fyrrum landsliðsframherji Englendinga, Gary Lineker, sem starfar í dag sem sparksérfræðingur hjá BBC, er virkur á Twitter og hefur gaman af því að grínast aðeins á þeim vettvangi.

Hann ákvað að skjóta aðeins á Chelsea í morgun og tísti að Chelsea væri að reyna að hafa samband við hann. Hann benti þeim þó á að það hefði lítið upp á sig, hann væri of lítill.

Lineker er 1,77m en þeir Crouch, Dzeko og Carroll eru allir um 2 metrar á hæð.

Believe Chelsea have been trying to get in touch. Sorry, Antonio, you’re wasting your time. I’m too short.

— Gary Lineker (@GaryLineker) January 19, 2018