Pytlick hafði enga lyst á pönnu­kökum í Ráð­húsinu

Flestallir þeirra þúsunda sem mættu virtust vera í góðum gír þó kuldinn í Köben biti aðeins frá sér. Dönsku gulldrengirnir sungu og trölluðu, einhverjir í fyrsta sinn, eins og Mads Svane Knudsen sem missti sig aðeins og knúsaði Maríu Danadrottningu, en ekki margir í þessum hópi voru með sína fyrstu gullmedalíu um hálsinn.

Rasmus Lauge lofaði því að hann væri ekki hættur með landsliðinu og stefndi á að verða fimmfaldur heimsmeistari á næsta ári.

Mathias Gidsel sagði að núna myndi fólk loksins hætta að gera grín að Danmörku.

„Allur handboltaheimurinn hefur strítt okkur og sagt við gætum ekki unnið EM, en núna sjá allir að við getum líka fundið leiðir til að vinna EM“ sagði sá markahæsti á svölum Ráðhússins.

Aðrir voru feimnir, eins og markmaðurinn Kevin Möller, sem var valinn mikilvægasti leikmaður úrslitaleiksins í gær. Hann sagðist ekki njóta sviðsljóssins, en Emil Nielsen var til í að taka sjálfsmyndir með áhorfendunum. Þeirra á meðal var þýski markmaðurinn Oliver Kahn.

Simon Pytlick, markahæsti leikmaðurinn í úrslitaleiknum, átti aðeins erfitt með sig í dag og sagði partýið í gærkvöldi sitja í sér.

„Ég finn aðeins fyrir þessu. Ég hafði allavega ekki lyst á pönnukökunum í Ráðhúsinu“ sagði Pytlick en hann þarf að vera fljótur að jafna sig því danska landsliðið er á leiðinni í eftirpartý á Søpavillonen, skemmtistað í Kaupmannahöfn sem yngri bróðir Nikolaj Jacobsen á. Eksta Bladet greindi frá því.