Domino's Körfuboltakvöld: "Ennþá með hrútspungana upp í sér“

Kjartan Atli og félagar í Dominos Körfuboltakvöldi voru sammála um það að spilamennska Keflavíkur hafi verið hræðileg í gærkvöldi.

Grindavík unnu öruggan 25 stiga sigur á nágrönnum sínum í Keflavík í 14.umferð Dominos-deildar karla en lokatölur voru 85-60.

„Það voru ekki bara Grindvíkingar sem voru góðir heldur voru Keflvíkingar líka arfaslakir. Það var þorrablót Keflavíkur síðustu helgi og þeir voru greinilega bara ennþá með hrútspungana upp í sér,“ sagði Kjartan Atli til að byrja umræðuna.

„Þeir verða svo rosalega ráðalausir þegar þeir detta í þennan gír og þá er enginn sem tekur stjórnina, sem Hössi á kannski að vera að gera í þessari stöðu,“ sagði Kristinn Geir.

„Hössi er ekki að skila sínu hlutverki í þessum leik sem eru auðvitað bara mikil vonbrigði fyrir Keflvíkinga því hann á að vera þetta akkeri fyrir liðið.“

Kjartan Atli bætti síðan við að ef einhvern tímann ættu viðvörunarbjöllur að byrja að hringja þá væri það núna og voru þeir félagar sammála því.