Warnock svarar Guardiola fullum hálsi: "Mátti alveg endursýna tæklingu De Bruyne“

Neil Warnock, knattspyrnustjóri Cardiff í ensku B-deildinni, sakaði leikmenn Manchester City um hræðilegar tæklingar á fréttamannafundi sínum í morgun og náði með því að halda á lofti fréttamálinu sem varð til eftir bikarleik liðanna í síðasta mánuði.

Joe Bennett, leikmaður Cardiff, var harðlega gagnrýndur fyrir tæklingu sína á þýska landsliðsmanninn Leroy Sane en sá þýski meiddist í sex vikur vegna brotsins. Guardiola hafði mjög takmarkaðan húmor fyrir því og lét leikmenn Cardiff heyra það.

Warnock sagði á fundinum í morgun að City-menn tækli nú alveg hressilega en eftir þennan leik hafi fjölmiðlamenn og aðrir aðeins einbeitt sér að hans strákum.

„Ég hefði viljað sjá hæga endursýningu af tæklingu Kevin De Bruyne á Jazz Richards þar sem hann fór með sólann á undan sér,“ sagði Warnock.

„Svo tæklaði Fernandinho ansi harkalega í leiknum gegn West Brom. Þar sáust nokkrar skelfilegar tæklingar en ekkert var sagt því það voru 8-9 aðrir leikir í gangi. Þennan dag sem við spiluðum við City var bara einn annar leikur og hann var lítið fyrir augað.“

Warnock er þó alveg sammála að tækling Bennett var óboðleg enda fékk leikmaðurinn að heyra það.

„Ég gekk frá honum þegar að ég sá þetta. Ég sagði við að hann að eftir svona tæklingar þarf ég að upplifa þrjá daga af helvíti. Bennett baðst afsökunar og lofaði að gera þetta ekki aftur,“ sagði Neil Warnock.