Framherji þjáist af þunglyndi: „Rottan í höfðinu lætur sjá sig á kvöldin“

„Ég sat á rúminu og grét. Ég var svo langt niðri á tímapunkti að ég íhugaði að keyra á vegg. Mér fannst þetta bara búið hjá mér. Ég var búinn að vera.“

Svona lýsir Billy Knee, framherji enska D-deildarliðsins Accrington Stanley, erfiðasta tímapunktinum á sinni ævi, en þessi mikli markahrókur glímir við ofsakvíða og þunglyndi.

Hann segir sögu sína í viðtali við breska ríkissjónvarpið sem má sjá hér, en þessi 27 ára gamli kappi hefur verið atvinnumaður í fótbolta síðan árið 2009.

„Af hverju vill einhver sem er í besta starfi í heimi fremja sjálfsvíg? Það er eitthvað rangt við það. Ég er svo heppinn að vera á þeim stað sem ég er að ég má ekki henda því öllu frá mér vegna sjúkdóms,“ segir Knee.

Hann segist hafa náð fínum bata undanfarna 18 mánuði en hann þarf að taka lyf á hverjum morgni til að halda sjúkdómnum niðri.

„Þunglyndi er alvarlegur sjúkdómur. Fólk sem glímir við hann á virkilega bágt. Ég var svo að komast að því ég að er líka með vott af geðhvarfasýki og þetta tengist allt saman. Það er nýtt fyrir mér og ég er að læra um þennan sjúkdóm. Nýju pillurnar mínar hafa róað mig mikið og vonandi halda þær áfram að virka,“ segir Knee.

John Coleman, knattspyrnustjóri félagsins, sýndi Knee mikinn skilning og sagði honum að taka sér að minnsta kosti eins mánaðar frí frá æfingum. En, það var svo faðir Knee sem reif hann á fætur.

„Ég var næstum búinn að ákveða að hætta í fótbolta og ég flutti inn til mömmu og pabba. Faðir minn leyfði mér ekki að sitja og gera ekki neitt. Hann sagði að ég þyrfti að taka þátt í lífinu og vildi fá mig með sér í byggingarvinnuna sína. Ég var byrjaður aftur í fótbolta þremur vikum síðar,“ segir Knee sem lýsir sjúkdómnum sem rottu.

„Þessi rotta lætur sjá sig um sjö á kvöldin. Undanfarið hefur þetta verið allt í lagi en þegar ég stressaður eða áhyggjufullur hleypur rottan um hausinn á mér og kemur í veg fyrir að ég geti sofið. Þá er maður pirraður og erfiður daginn eftir. Það er út af þessari rottu. Fólk sem ég hef talað við um þetta kannast við þessa rottu,“ segir Billy Knee.