Skiluðu inn 57 þúsund skotvopnum

Íbúar Ástralíu skiluðu 57 þúsund skotvopnum til yfirvalda á síðasta ári. Á þriggja mánaða tímabili í fyrra gátu allir skilað inn óskráðum og ólöglegum skotvopnum án þess að eiga hættu á nokkrum eftirmálum af því.

Þetta var gert í annað sinn í landinu, en slíkur háttur var einnig hafður á árið 1996 þegar morðingi skaut fjölda manns til bana í Tasmaníu. Eftir skotárásina, sem kennd er við Port Arthur, var byssulöggjöfin í Ástralíu tekin í gegn. 

Síðan þá hafa ekki verið framin fjöldamorð með skotvopnum í landinu. Fjölmargir Bandaríkjamenn horfa til reynslu Ástrala þegar rætt er um herta skotvopnalöggjöf vestanhafs.

Hugmyndin með þriggja mánaða átakinu er að fækka ólöglegum vopnum í landinu og eru yfirvöld mjög ánægð með árangurinn, sem geri samfélagið öruggara.

Meðal vopnanna sem rötuðu á borð stjórnvalda þessa þrjá mánuði voru 2500 sjálfvirk skotvopn, 2900 skammbyssur og sprengjuvarpa, sem sjá má hér að ofan. 

Um þriðjungi vopnanna var fargað meðan öðrum var komið í sölu. Lögreglan telur að um 260 þúsund skotvopn megi enn finna í undirheimum Ástralíu.