Seinni bylgjan: „Er svo hneykslaður á þessu að ég næ ekki upp í nefið á mér“

Eitt helsta umræðumál íslensks handbolta eftir loka umferð Olís deildar karla var að ÍBV var með átta leikmenn inni á vellinum eftir sigurmark þeirra gegn Fram, sem jafnframt tryggði þeim deildarmeistaratitilinn.

Selfoss, sem hefði orðið deildarmeistari hefði leikurinn farið í jafntefli eða Fram unnið, kærði framkvæmd leiksins eins og Vísir greindi frá í gær.



Í gærkvöld fór fram uppgjörsþáttur Seinni bylgjunnar á Stöð 2 Sport þar sem þetta mál var að sjálfsögðu tekið fyrir. Gunnar Berg Viktorsson, einn spekinga þáttarins, var vægast sagt hneykslaður á kærunni.

„Ég bara veit ekki hvað skal segja um svona. Það er fordæmalaust að annað lið sé að kæra einhvern leik sem þeir eru ekki þáttakandi að,“ sagði Gunnar Berg.

„Mér finnst þetta ótrúlega skrítið og ég er svo hneykslaður á þessu að ég næ ekki upp í nefið á mér.“

En afhverju var kæran svona hneykslanleg, Selfoss hafði hagsmuna að gæta í þessum leik og var framkvæmdin greinilega ólögleg.

„Í fyrsta lagi hefur Magnús [Stefánsson, áttundi maðurinn í liði ÍBV] engin áhrif á leikinn þarna, það er klárt mál. Þetta gerist í öllum leikjum út um allt. Ef að Selfyssingar eru að kæra, á varamannabekknum hjá þeim eru ekki nema svona 10 sentimetrar [í völlinn] og það er alltaf einhver leikmaður hjá þeim að labba inn á völlin óafvitandi.“

„Auðvitað er þetta ólöglegt, en menn líta framhjá þessu. Ég stórefa að þeir muni gera eitthvað í þessari kæru.“

Sú varð raunin, en Vísir greindi frá því í dag að dómstóll HSÍ hafi vísað málinu frá.

Strákarnir í Seinni bylgjunni ræddu einnig rafmagnsleysið í Safamýrinni og Tómas Þór Þórðarson ljóstraði því upp hverjir hafi verið á bak við myrkrið sem skall á í miðjum leik. Myndbrotið úr þættinum má sjá hér fyrir neðan.