Átta manns haldið í gíslingu í verslun í Frakklandi

Átta manneskjum er haldið í gíslingu í verslun í franska bænum Trebes. Greint er frá þessu á vef Reuters þar sem vitnað er í franska fjölmiðla sem segja manninn sem heldur fólkinu í gíslingu hafa skotið í átt að lögreglumanni. Á vef breska ríkisútvarpsins BBC kemur fram að fjórir lögreglumenn hefðu átt leið fram hjá versluninni og að maðurinn hafi skotið í átt að þeim og sært einn þeirra en þó ekki alvarlega.

Reuters segir franska fjölmiðla greina frá því að maðurinn hafi svarið hollustu við hryðjuverkasamtökin ISIS. BBC hefur eftir saksóknurum í Frakklandi að maðurinn hafi sagst tilheyra ISIS. Þá kom fram á vef BBC að sérsveit lögreglu hefði ráðist til atlögu inn í verslunina.

Þar er haft eftir forsætisráðherra Frakklands, Édouard Philippe, að staðan væri talin grafalvarleg.