Milljón dollara miðinn kominn í sölu

Tónlistarhátíðin Secret Solstice er að taka á sig mynd, flestir listamenn eru bókaðir og Laugardalurinn er tilbúinn að taka á móti hátíðinni sem verður frá 21.-24 júní. Rokkkóngarnir í Slayer, leðurbarkinn Bonnie Tyler auk gömlu hundanna í Jet Black Joe ásamt fjölmörgum öðrum stórum og smáum munu telja í og slá taktinn í Laugardal. Hægt er að njóta hátíðarinnar ef peningar eru ekki vandamál því milljón dollara miðinn er kominn í sölu.

Fyrir eina milljón dollara, eða rúmlega 100 milljónir er hægt að fá gullna miðann á hátíðina, sem er samkvæmt tilkynningu sagður vera dýrasti tónleikamiði í heimi. Hver vill ekki óþrjótandi kampavín þegar hann lendir á einkaþotunni sem hátíðin útvegar? Hver vill ekki sólahringsaðgang að tveimur bílum og bílstjórum sem og leiðsögumanni um borgina, HM-veislu þar sem hægt er að horfa á hvaða leik sem er með einkakokk fyrir þig og þína gesti sem og endalausar pylsur á Bæjarins beztu.

Ef 100 milljónir eru aðeins of mikið er einnig í boði Pakki guðanna á 14.800 dollara eða um 1,5 milljónir, en þrír slíkir verða seldir, og Óðinn sem er á rétt rúmlega 2.000 dollara sem gerir rétt rúmlega 200 þúsund. Forsvarsmenn hátíðarinnar svöruðu ekki þegar Fréttablaðið leitaði svara.

Gullni miðinn

• Fram og til baka á einkaþotu, Gulfstream G300 eða álíka fyrir sex manns.
• Lúxusgisting alla Secret Solstice vikuna.
• Komupartí með endalausu kampavíni og íslensku góðgæti útbúnu af einkakokki.
• Partí með alþjóð- legri stjörnu sem kemur fram á hátíðinni sem og einkatónleikar fyrir þig og þína gesti.
• Sérstök 66°Norður pop-up búð á hótelherberginu.
• Einkahárgreiðslumaður og förðunarfræðingur til að passa upp á glamour-inn.
• Sólarhringsaðgangur að tveimur bílstjórum sem aka viðkomandi og gestum hvert sem er á lúxusbílum.
• Daglegt slökunarnudd fyrir viðkomandi og gesti.
• Sérstakt HM-partí þar sem hægt er að horfa á hvaða leik sem er með einkakokki.
• Einkatúr með þyrlu um jökla og eldfjöll Suðurlands.
• VIP-miðnætursigling á snekkju fyrir viðkomandi og gesti ásamt listamanni sem kemur fram á hátíðinni.
• Miðinn tryggir aðgang baksviðs og fram fyrir röð.
• Endalausar pylsur á Bæjarins beztu.
• Ferð á Langjökul á vélsleðum.
• Þekktur ljósmyndari mun mynda þá ferð.
• Einkaferð í Jökulsár- eða Fjallsárlón.
• Matur inni í helli sem verður lýstur upp með kertum.