Fær bætur vegna andláts Ellu Dísar

Sinnum heimaþjónusta og Reykjavíkurborg hafa gert sátt við Rögnu Erlendsdóttur vegna andláts Ellu Dísar Laurens árið 2014. Ragna fær þrjár milljónir króna vegna sáttarinnar og 800 þúsund krónur vegna málskostnaðar. Þetta kemur fram í tilkynningu frá Sinnum þar sem einnig kemur fram að hvorki fyrirtækið né Ragna muni tjá sig frekar um málið.

Ragna stefndi Reykjavíkurborg og sinnum í fyrra vegna andláts Ellu Dísar árið 2014. Í stefnu hennar sagði hún starfsmann Sinnum hafa verið að færa Ellu annað hvort úr hjólastól eða sjúkrarúmi og yfir í vinnustól. við það hafi öndunarrör hennar færst úr stað sem olli því að Ella fékk ekki öndun. Starfsmenn Sinnum höfðu þjónað Ellu Dís um árabil.

Hún var færð á sjúkrahús og lést nokkrum mánuðum síðar.

Héraðsdómur Reykjavíkur dæmdi Sinnum í október til að greiða Rögnu þrjár milljónir en sýknaði Reykjavíkurborg. Ragna hafði farið fram á fimm milljónir króna.

Var það mat Héraðsdóms Reykjavíkur að andlát Ellu Dísar yrði rakið til stórfellds gáleysis stjórnenda Sinnum ehf., með því að setja ófaglærðan starfsmann í aðstæður sem hann gat ekki ráðið við.

Sinnum áfrýjaði niðurstöðunni en hefur nú dregið þá áfrýjun til baka.

Sjá einnig: Móður Ellu Dísar dæmdar bætur vegna gáleysis stjórnenda Sinnum



Ragna segir í áðurnefndri tilkynningu að þetta mál hafi verið henni og fjölskyldu hennar afskaplega erfitt.

„Það er mér mikilvægt að ná málalokum við Sinnum án frekari málaferla.“

Í tilkynningunni segir einnig að Ragna ætli nú að líta fram á veginn og stefni á að ljúka ritun bókar um lífskeið dóttur sinnar, á næstu mánuðum.

„Við hjá Sinnum erum afar þakklát því að náðst hafi sátt í þessu erfiða og viðkvæma máli,“ segir Sigrún Björk Jakobsdóttir, nýskipaður framkvæmdastjóri Sinnum heimaþjónustu. Hún segir sömuleiðis að þessi tími hafi verið öllum sem að þessu máli komu erfiður en lærdómsríkur og því sé sáttin mikilvægur endapunktur.