Starfsfólk Arion banka fær hlutabréf í bankanum fari hann á markað

Fari Arion banki á markað á árinu mun starfsfólk hans fá hlutabréf í bankanum, en um 850 manns starfa hjá bankanum. Þetta var samþykkt af hluthafafundi og stjórn Arion banka.

Verði bankinn skráður í kauphöll mun hver starfsmaður fá hlutabréf sem samsvarar útborgun einna mánaðarlauna og yrði starfsfólki ekki heimilt að selja hlutabréfin fyrr en tveimur árum eftir afhendingu. Hætti starfsfólk hjá bankanum á því tímabili þarf það að skila bréfunum án endurgjalds.

Í tilkynningu frá bankanum segir að ekki hafi verið tekin ákvörðun um skráningu bankans á markað, en undirbúningur að breyttu eignarhaldi standi yfir og er almennt hlutafjárútboð í aðdraganda skráningar eitt af því sem er í skoðun.

Heildarkostnaður bankans er áætlaður á bilinu sex til sjö hundruð milljónir króna komi til skráningar, þar af er um helmingur tekjuskattur sem rennur til ríkisins og launatengd gjöld.