Wilshere vill vera áfram hjá Arsenal

Jack Wilshere vonast eftir því að ná samkomulagi við Arsenal um framlengingu á samningi sínum við félagið.

Enski landsliðsmaðurinn verður samningslaus í sumar og hefur ekki komist að samkomulagi um framlengingu til þessa.

„Stjórinn er farinn sem hefur breytt hlutunum því ég veit ekki hver tekur við á næsta tímabili og það getur haft áhrif,“ sagði Wilshere sem hefur verið leikmaður Arsenal síðan hann var níu ára.

„Við erum þó enn að ræða saman og báðir aðilar eru vongóðir um það að við getum klárað þetta.“

„Í sannleika sagt þá hef ég ekki hugsað neitt út í það að fara eitthvað annað. Ég vil vera hér og hef ekki haft neinn tíma til þess að hugsa um að fara eitthvað annað.“

Wilshere kom ekki við sögu í tapinu gegn Manchester United um síðustu helgi en er reiknað með honum í byrjunarliðinu í seinni undanúrslitaleik Evrópudeildarinnar gegn Atletico Madrid á fimmtudag.