ÍR sótti sigur á Selfoss

ÍR náði í sín fyrstu stig í Inkasso deild karla í fóbolta í dag þegar liðið sótti sigur á Selfoss. HK og Víkingur Ó. skildu jöfn í Kórnum.

Færin voru ekki mörg í fyrri hálfleik á Selfossi en gestunum úr Breiðholti tókst að pota inn marki á loka sekúndum hálfleiksins þegar Björgvin Stefán Pétursson fékk boltann í fæturna eftir darraðadans í teignum og skilaði honum í autt markið.

Selfyssingar byrjuðu seinni hálfleikinn sterkt og áttu gott færi strax á fyrstu mínútunum en skot Kenan Turudija fór í varnarmann ÍR. Heimamenn sóttu meira í seinni hálfleiknum, enda þurftu þeir á marki að halda, en ÍR bætti öðru marki við eftir frábæra skyndisókn. Andri Jónasson átti góða fyrirgjöf inn frá hægri og Guðfinnur Þórir Ómarsson skoraði framhjá Stefáni Loga Magnússyni í markinu.

Fleiri urðu mörkin ekki og 2-0 sigur Breiðhyltinga staðreynd.

Ólsarar, sem unnu einmitt ÍR í fyrstu umferðinni, sóttu HK heim í Kórinn og byrjaði leikurinn þar af krafti með mikilli baráttu án þess að skapa sér afgerandi færi.

Heimamenn í HK komust yfir eftir hálftíma leik eftir skyndisókn upp úr horni Víkings. Brynjar Jónasson, bróðir Andra sem lagði upp seinna mark ÍR, setti boltann fyrir þar sem Kári Pétursson skallaði boltann í markið.

Það tók gestina þó aðeins átta mínútur að jafna leikinn. Gonzalo Zamorano skoraði þá með því að fylgja eftir vörslu Arnars Freys Ólafssonar frá Kwame Quee. Jafnt var þegar liðiðn gengu til hálfleiks.

HK fékk gullið tækifæri til þess að komast aftur yfir í seinni hálfleik þegar víti var dæmt á 67. mínútu. Bjarni Gunnarsson skaut hins vegar í stöngina.

Bæði lið börðust af krafti það sem eftir lifði en komu boltanum ekki í netið, 1-1 jafntefli niðurstaðan.

ÍR stekkur með sigrinum upp í sjötta sætið með þrjú stig. HK og Víkingur eru bæði komin með fjögur stig. Einn leikur er þó eftir af annari umferð en Haukar fá Magna í heimsókn nú klukkan 16:00. Upplýsingar um markaskorara og úrslit eru fengnar frá Fótbolta.net.