„Skammastu þín, Salvador Sobral“

Portúgalska söngvaranum Salvador Sobral tókst að móðga keppendur og aðdáendur Eurovision, söngvakeppni evrópskra sjónvarpsstöðva. Margir segja að hann þurfi að biðjast afsökunar, þar á meðal Felix Bergsson. Sobral söng sig inn í hjörtu Evrópu og vann keppnina á síðasta ári með laginu Amar Pelos Dios sem hann samdi ásamt systur sinni Luísu Sobral. 

Á Eurovision-aðdáendasíðunni Wiwibloggs er sagt frá því iað Sobral hafi talað niður keppnina í viðtali við portúgalska dagblaðið Publico. Sagðist hann heppinn að þurfa ekki að hlusta af neitt af lögunum sem taka þátt í ár og gagnrýndi einnig framlag Ísrael sem er spáð í efstu þremur sætunum í keppninni. 

„Ég þekki bara lögin frá Portúgal og Ísrael, því að Youtube neyddi mig til að sjá það. Youtube hélt að mér myndi líka lagið frá Ísrael. Ég opnaði það og lagið er hræðilegt. Sem betur fer þarf ég ekki að hlusta á neitt í ár.“  

Netta Barzilai sem flytur lagið Toy fyrir hönd Ísrael og ákvað hún að senda bara ást á Twitter til Sobral eftir að frétta af ummælum hans.  

Felix Bergsson skrifaði á Facebook síðu sína í gær að hann vonaði að Salvador biðjist afsökunar á hrokafullum ummælum sínum „sem eru að valda Portúgölum miklu hugarangri og aðdáendum SS vonbrigðum.“ Sagði hann Sobral móðga aðra listamenn á einstaklega klaufalegan máta.

Gagnrýndi Felix þar einnig ritskoðun Kína en eins og kom fram á Vísi fyrr í dag hefur Samband evrópskra sjónvarpsstöðva bannað einni vinsælustu sjónvarpsstöð í Kína að sýna frá keppninni. Ástæðan er sú að sjónvarpsstöðin Mango TV huldi og máði út hvers kyns tákn, húðflúr eða fána sem vísuðu til hinsegin samfélagsins og fóru frekar í auglýsingahlé en að sýna framlög Írlands og Albaníu í undankeppninni.

Jacques Houdek, sem keppti fyrir hönd Króatíu í keppninni á síðasta ári með laginu My Friend, er líka í hópi þeirra sem hafa gagnrýnt Sobral harðlega fyrir ummælin.

„SKAMMASTU ÞÍN, Salvador Sobral!!! SKAMMASTU ÞÍN!!! Er það svona sem sigurvegari Eurovision á að tala opinberlega? Þú reyndir svo mikið að sýna þig sem auðmjúkan mann, sem sannan listamann og þú gætir hafa blekkt alla Evrópu, en þú platar mig ekki!“

Houdek segir að Sobral ætti að biðjast strax afsökunar á ummælum sínum og hegðun.

Þetta er ekki í fyrsta skipti sem söngvarinn móðgar keppendur og aðdáendur Eurovision. Eftir keppnina á síðasta ári líkti hann tónlistinni í Eurovision við skyndibita, lög með enga merkingu eða innihald. Líkti hann samt eigin lagi við heilbrigða máltíð. Í viðtalinu núna sagði hann að ekkert hafi breyst eftir að hann vann keppnina. 

Sobral var fagnað eins og þjóðhetju við heimkomuna eftir keppnina því að þetta var í fyrsta skipti sem Portúgal vann eftir að hafa tekið þátt 49 sinnum frá árinu 1964. Í viðtalinu við Publico segir Sobral að það hafi ekki verið auðvelt að koma heim sem sigurvegari keppninnar.  

„Þetta var erfitt. Ég var þreyttur á að gráta. Ég sagði við sjálfan mig „hvað geri ég?“ Ég gat ekki farið út.“ 

Sobral gekkst undir hjartaígræðslu í desember á síðasta ári en aðgerðin var framkvæmd á Santa Cruz-sjúkrahúsinu í Lissabon, höfuðborg Portúgal. Sobral mun flytja sigurlagið sitt aftur á úrslitakvöldi keppninnar á laugardag.

Hér að neðan má hlusta á framlag Ísrael til keppninnar í ár.