„Ég held hún yrði frábær borgarstjóri“

„Auðvitað vil ég einna helst sjá Lóu sem borgarstjóra af því að mér finnst hún frábær. Ég hef þekkt hana í gegnum tíðina, hún er fylgin sér, hún þekkir vel mál og setur sig vel inn í málin. Ég held hún yrði frábær borgarstjóri,“ segir Þorgerður Katrín Gunnarsdóttir, formaður Viðreisnar, um Þórdísi Lóu Þórhallsdóttur, oddvita Viðreisnar í Reykjavík, sem þessa dagana á í viðræðum um myndun meirihluta með Samfylkingu, Vinstri grænum og Pírötum.

Þrátt fyrir að Þorgerður treysti Þórdísi Lóu hvað best til þess að gegna stöðu borgarstjóra segir hún að málefnin ráði för í viðræðunum.

„Við höfum nálgast þetta út frá málefnunum og ef málefnin eru skýr og við sjáum raunverulegar breytingar að þá segi ég, fyrir mína parta, að þau skipta meira máli en borgarstjórastóllinn sjálfur. Að því sögðu er ég ekki að segja að það sé sjálfgefið að borgarstjórinn verði með einhverjum tilteknum hætti, við skulum bara tala hreint út, að það verði Dagur eða einhver af þessum fjórum,“ segir Þorgerður sem var gestur í útvarpsþættinum Harmageddon á X-inu.

Niðurstaða kosninga ákall um breytingar

Þorgerður segir að staða Viðreisnar í viðræðunum sé gríðarlega sterk. Hún þvertekur fyrir það að Viðreisn sé að hlaupa í skarðið fyrir Bjarta Framtíð og að framlengja líftíma fráfarandi meirihluta.

„Þau eru mjög meðvituð um það, Þórdís Lóa og Pawel [Bartoszek] að niðurstaða kosninga er líka ákall um ákveðnar breytingar, við verðum að átta okkur á því að gamli meirihlutinn var með 63% fylgi. Flokkarnir sem eru eftir eru með 38% fylgi. Það þýðir ekkert að segja að við komum í staðinn fyrir Bjarta framtíð, það vantar töluvert mikið upp á að ná þessum 63%. Það segir svolítið mikið og á að veita Viðreisn, að mínu mati, sterka stöðu til þess að ná fram málefnum sem hafa raunverulega þýðingu fyrir borgarbúa og því sem við töluðum fyrir, sérstaklega að einfalda líf bæði heimila fólks og fyrirtækja í borginni.“

Þorgerður bætir þó við að fólk verði að hafa það hugfast að um margra flokka samvinnu er að ræða og við slíkar aðstæður þurfi bæði að fara í málamiðlanir og nálgast málefnin af virðingu.

 

Viðreisn nær fótfestu

Þorgerður er gríðarlega ánægð með árangur hins unga stjórnmálaflokks Viðreisnar. Flokkurinn kom vel út úr kosningum í Kraganum og Reykjavík auk þess Viðreisn hefur átt í samstarfi við aðra flokka úti á landi eins og samstarfið með Pírötum í Árborg. En betur mál ef duga skal segir Þorgerður:

„Það er augljóst að við eigum ákveðið svona kjarnafylgi á suðvestur horninu og við ætlum að færa okkur út víðar. Við þurfum að ná betur til landsbyggðarinnar svo ég fari svolítið í sjálfsgagnrýni. Við þurfum að sýna fólki fram á það að það sem við erum helst að tala um sem er stærsta hagsmunamál heimilanna sem er nýr gjaldmiðill að það skiptir fjölskyldurnar, hvort sem þær eru hérna á suðvesturhorninu eða úti á landsbyggðinni, meginmáli.“

Í spilaranum hér að neðan er hægt að hlusta á viðtalið í heild sinni.