Heimsmeistararnir úr leik í riðlakeppninni í fyrsta skipti í 80 ár

Ríkjandi heimsmeistarar, Þjóðverjar, eru úr leik á HM 2018 í Rússlandi eftir að liðið tapaði 2-0 gegn Suður-Kóreu á Kazan-leikvanginum í dag. Bæði mörkin komu í uppbótartíma.

Þetta er í fyrsta skipti á HM sem Þjóðverjarnir fara ekki upp úr riðlinum í HM-sögunni en upp úr F-riðlinum fara Svíþjóð og Mexíkó.

Í fyrri hálfleik var ekki mikið að gerast hjá Þjóðverjunum. Þeir reyndu og reyndu en náðu illa að brjóta niður þéttan varnarmúr Suður-Kóreu og Cho Hyun-Woo átti afar góðan leik í markinu.

Ef eitthvað er áttu Suður-Kóreu menn hættulegustu færin í fyrri hálfleik. Framlína Þjóðverja náðu sér ekkert á strik og menn eins og Timo Werner, Mesut Özil og fleiri náðu ekki að komast í takt leikinn.

Staðan var markalaus í hálfleik og Þjóðverjarnir mættu örlítið ákveðnari í síðari hálfleik. Þeir náðu þó ekki að skapa sér mörg opin tækifæri en þeim fjölgaði þegar leið á.

Besta færið fékk líklega Mats Hummels þremur mínútum fyrir leikslok. Mesut Özil kom þá með frábæra fyrirgjöf beint á kollinn á Hummels en skalli hans fór yfir markið af markteignum.

Það var svo í uppbótartíma sem Suður-Kórea komst yfir. Eftir hornspyrnu barst boltinn til Kim Young-Gwon og hann kom boltanum í netið. Fyrst um sinn dæmdi dómarinn rangstöðu en eftir VAR-tæknina dæmdi hann mark. Hárréttur dómur.

Þjóðverjarnir voru svo allir komnir fram er Son Heung-Min skoraði í autt markið í uppbótartímanum eftir langa sendingu fram völlinn. Fyrsta Asíu-liðið til þess að vinna heimsmeistara í opinberum leik.

Þetta er í fyrsta skipti síðan á HM 1938 sem Þjóðverjarnir komast ekki upp úr riðlinum en síðustu fjórar keppnir hafa þeir farið alla leið í undanúrslit.