Jafntefli í bráðfjörugum leik Japans og Senegal

Japan og Senegal gerðu 2-2 jafntefli í fjörugum leik í öðrum leik dagsins á HM í knattspyrnu. Bæði lið eru með fjögur stig eftir fyrstu tvo leikina.

Bæði lið unnu nokkuð óvænta sigra í fyrstu umferðinni en Senegal hafði betur gegn Póllandi á meðan Japan vann Kólumbíu.

Fyrri hálfleikurinn var mjög fjörugur og fyrsta markið skoraði Sadio Mane eftir skelfileg mistök Eiji Kawashima í marki Japan en Japan hafði verið betri aðilinn fram að þessu.

Á 34. mínútu jafnaði Takashi Inui. Skemmtilegt spil sem endaði með því að Inui fékk boltann og átti ekki í erfiðleikum með að koma boltanum í netið. 1-1 í hálfleik en Japan sterkari aðilinn.

Áfram héldu Japanir að stýra leiknum en það var hins vegar Senegal sem komst aftur yfir er Moussa Wague, nítján ára bakvörður, skoraði laglegt mark eftir fyrirgjöf á 71. mínútu.

Það var svo hinn ólseigi Keisuke Honda sem jafnaði metin fyrir Japan á nýjan leik tólf mínútum fyrir leikslok og lokatölur 2-2. Bæði lið því með fjögur stig eftir tvo leiki.

Í lokaumferðinni mætast Pólland og Japan og Kólumbía og Senegal en í kvöld mætast Pólland og Kólumbía. Bæði Japan og Senegal eru í fínni stöðu fyrir lokaumferðina.