Króatía komið áfram eftir stórsigur gegn Argentínu

Króatía er komið áfram í 16-liða úrslit HM 2018 eftir 3-0 sigur á Argentínu í viðureign liðanna í riðli okkar Íslendinga í kvöld.

Fyrri hálfleikurinn fór rólega af stað en fjörin varð meira eftir því sem leið á. Í síðari hálfleik setti Króatía í fluggír, skoraði þrjú mörk og Króatía því komið upp úr riðlinum á meðan Argentína er í vandræðum.

Það var ekki mikið fyrir augað fyrstu mínúturnar í leiknum. Króatarnir voru vel skipulagðir og létu Argentínumenn hafa boltann sem fundu fá svör á sterkum og þéttum varnarleik Króata.

Þegar líða fór á hálfleikinn fór þetta aðeins að opnast og með þriggjar mínútu millibili fengum við tvö dauðafæri í fyrri hálfleik en bæði lið fengu sitthvort færið.

Fyrst var það Argentína en Enzo Pérez skaut boltanum framhjá nánast auðu marki þar sem Subasic, markvörður Króatíu, var farinn í skógarúthlaup. Varnarmenn Króata gerðu Enzo erfitt fyrir en dauðafærið var þó algjört.

Þremur mínútum síðar fékk Mario Mandzukic dauðafæri á fjærstönginni en skalli hans fór í hliðarnetið. Dauðafæri sem maður sér Mandzukic skora úr í hverjum níu af tíu skiptum sem hann fær svona færi.

Markalaust í hálfleik en á áttundu mínútu síðari hálfleiks kom fyrsta mark leiksins. Willy Caballero reyndi þá að vippa boltanum yfir Anto Rebic sem pressaði hann, vippann fór beint á Rebic sem klippti boltann skemmtilega í netið.

Ömurleg mistök Caballero og Argentína þurfti jöfnunarmark. Þeir settu Gonzalo Huguain inn á og Paulo Dybala einnig síðar meir en allt kom fyrir ekki og Króatar bættu enn frekar í.

Tíu mínútum fyrir leikslok gerði Luka Modric nær út um leikinn með þrumuskoti fyrir utan teig en Króatarnir voru ekki hættir. Þeir bætti við þriðja markinu í uppbótartíma en það gerði Ivan Rakitic eftir undirbúning Kovavic.

Króatar eru því komnir með sex stig og eru komnir upp úr D-riðlinum. Argentínumenn eru með eitt stig eftir fyrstu tvo leikina og eru einfaldlega í bullandi vandræðum. Ísland getur því komið sér í ansi góð mál með sigri á Nígeríu á morgun.