Ed Westwick verður ekki ákærður fyrir nauðgun

Leikarinn Ed Westwick sem er þekktastur fyrir hlutverk sitt í þáttunum Gossip Girl verður ekki ákærður fyrir þrjár nauðganir sem hann var sakaður um í fyrra. Saksóknari í Los Angeles segir skort vera á sönnunargögnum í málunum.

Ein kvennana, leikkonan Kristina Cohen, sagði frá því í Facebook-færslu í nóvember á síðasta ári að leikarinn hefði misnotað hana í gestaherbergi á heimili hans þar sem hún var gestkomandi ásamt þáverandi kærasta sínum, sem var vinur leikarans.

Sjá einnig: Leikkona sakar Ed Westwick um nauðgun

Saksóknari sagði vitnisburð vitna í málinu vera ófullnægjandi og þau gátu ekki útvegað nægilegar upplýsingar til þess að fara með málið lengra. Þá gaf þriðja fórnarlambið sig aldrei fram við saksóknara, og því féll það mál niður.

Málið vakti mikla athygli og var honum meðal annars skipt út úr BBC þáttaröðinni Ordeal by Innocence eftir ásakanirnar. 

Westwick neitaði sök í málinu og sagðist ekki þekkja Cohen. Hann sagðist jafnframt aldrei hafa beitt valdi og alls ekki gegn konu.