Höfðu heyrt orðróm um veikindin en sumarfrí var svarið

Vigdís Hauksdóttir, borgarfulltrúi Miðflokksins, segir að minnihlutinn hefði ekki lagt fram bókun er sneri að gagnrýni á fjarveru Dags B. Eggertssonar, borgarstjórans í Reykjavík, á fundi borgarráðs í síðustu viku hefðu upplýsingar um veikindi hans legið fyrir.

Kolbrún Baldursdóttir, borgarfulltrúi Flokks fólksins, segist hafa heyrt orðróm um veikindi borgarstjóra og því hafi verið óskað eftir upplýsingum um fyrirhugaða fjarveru hans. Svörin voru skýr. Hann væri í sumarfríi.

Minnihlutinn í borginni var allt annað en sáttur við fjarveru borgarstjórans. Var fjarveran gagnrýnd í aðdraganda síðasta fundar borgarráðs fyrir sumarfrí síðastliðinn fimmtudag. Á fundinum var lögð fram bókun þar sem borgarráðsfulltrúar Sjálfstæðisflokksins og áheyrnarfulltrúar Sósíalistaflokksins, Miðflokksins og Flokks fólksins sögðu það óásættanlegt að borgarstjóri væri fjarverandi á síðasta reglulega fundi borgarráðs.

„Það er sérstaklega ámælisvert í ljósi þeirra alvarlegu mála sem upp hafa komið síðustu daga sem brýnt er að fjallað sé um áður en borgarráð fer í sumarfrí.“

Óljós orðrómur svo þau spurðust fyrir

Um er að ræða álit umboðsmanns Alþingis um vanda heimilislausra í borginni, dóm Héraðsdóms Reykjavíkur sem dæmdi borgina til að greiða starfsmanni skaðabætur vegna slæmrar framkomu skrifstofustjóra borgarinnar og úrskurður kærunefndar jafnréttismála vegna brots á lögum við ráðningu á borgarlögmanni. Voru málin til umræðu á fundinum og svaraði Þórdís Lóa Þórhallsdóttir, borgarfulltrúi Viðreisnar og formaður borgarráðs, fyrir hönd borgarstjóra á fundinum.

Dagur B. Eggertsson borgarstjóri upplýsti í viðtali í Fréttablaðinu á laugardaginn að hann væri með gigtarsjúkdóm. Hann væri farinn að ganga með staf og ætti erfitt með svefn vegna verkja.

Vigdís Hauksdóttir, sem var sérlega gagnrýnin á fyrirhugaða fjarveru borgarstjóra, segir gagnrýni sína varðandi málin þrjú að sjálfsögðu eiga rétt á sér. Minnihlutinn hefði þó ekki lagt fram bókunina með gagnrýni á fjarveru Dags hefði legið fyrir að hann glímdi við veikindi. Kolbrún Baldursdóttir tekur undir þetta.

„Við vorum búin að heyra orðróm, þetta var mjög óljóst svo við ákváðum að spyrja Þórdísi Lóu hvort hann yrði fjarverandi á fundinum,“ segir Kolbrún. Hvort hann væri í sumarfríi eða einhver önnur ástæða væri fyrir fjarverunni.

Mannlegt og gott fólk

„Við myndum alls ekki vilja vera að koma með fjarverukvörtun ef maðurinn er veikur. Svarið var bara að hann væri í sumarfríi. Það hefði vel verið hægt að segja að hann væri í sumarfríi en væri búinn að glíma við veikindi,“ segir Kolbrún. Hún undirstrikar að þótt fólk sé ósammála í pólitík og takist á þá þyki borgarfulltrúum vænt hvert um annað.

„Við erum mannleg og gott fólk. Við viljum hafa þetta málefnalegt.“

Undir þetta tekur Eyþór Arnalds í samtali við Mbl.is.

„Við ósk­um hon­um að sjálf­sögðu góðs bata og að meðferðin gangi vel.“

Vigdís minnir á að málin þrjú séu engu að síður grafalvarleg.

„Við hefðum tekið þau mál jafnföstum tökum því þau eru áfellisdómur yfir borginni,“ segir Vigdís og er hugsi yfir því að málin þrjú komi upp á svo til sama tíma. Eftir að nýr meirihluti hefur verið myndaður.

„Það er skrýtið og mjög tilviljanakennt að þetta skuli allt koma upp eftir borgarstjórnarkosningar og eftir að búið er að mynda nýjan meirihluta.“