Ed Sheeran þreyttur og ætlar að taka sér frí

Tónlistarmaðurinn Ed Sheeran ætlar ekki að gefa út nýja plötu á næsta ári. Þegar tónleikaferðalag hans endar í næsta mánuði ætlar hann að taka sér frí. Hann segir það hafa tekið á að vera á tónleikaferðalagi í þrjú ár og hann þurfi að slaka á.

Sheeran gerði það sama þegar eftir að hann gaf út plötuna Multiply, þó hann hafi ef til vill ekki endilega verið að slappa af. Hann fór í teygjustökk, synti með hákörlum og ýmislegt fleira. Hann segist þó hafa skrifað ný lög í því „fríi“ og líklegast muni hann gera slíkt hið sama núna.

„Ég mun aldrei hætta að búa til tónlist. Það er áhugamálið mitt,“ sagði hann í viðtali við BBC. „Ég lýt ekki á tónlistasmíði sem vinnu. Þetta er vinna,“ bætti hann við og átti við að tala við blaðamenn. „Það er enginn sem tekur upp gítarinn í þeirri von að hann verði kallaður í viðtöl.“

Hinn 27 ára gamli Sheeran ætlar að vinna að nýju verkefni þó hann verði í fríi. Í stað þess að gera nýja plötu segir Sheeran að hann vilji breyta til. Hann segist vilja vinna að öðruvísi tónlist en hann er þekktur fyrir og jafnvel að hann vilji búa til söngleik eða snúa sér að leiklist. Sheeran hefur skotið upp kollinum í Game of Thrones, Bridget Jones‘s Baby og Home & Away.

Tilefni þess að Sheeran var í viðtali, þó hann sé augljóslega ekki mikið fyrir slíkt, er að frændi hans er að gefa út heimildarmynd um tónlistarmanninn. Hann segir þó engar sprengjur í þessari mynd.

„Þetta er bara ég að skrifa tónlist,“ sagði Sheeran og bætti við að hann vonaðist til þess að hvetja unga tónlistarhöfunda til þess að láta draum sinn rætast.

„Ég fór úr skóla í Suffolk og að búa út í rassgati í það að vera hér og það var bara með því að skrifa fjölda laga og spila á fjölmörgum tónleikum. Þið getið gert það,“ sagði Sheeran.

Hér að neðan má sjá viðtal Entertainment Tonight við Sheeran þar sem rætt var um brúðkaup hans og æskuástarinnar Cherry Seaborn. Hann hefur ekki viljað viðurkenna að þau hafi gift sig.