Yfir 34 þúsund manns séð Lof mér að falla

Eftir sautján daga í sýningu er Lof mér að falla orðin fjórða vinsælasta mynd ársins, situr sem fastast á toppi aðsóknarlistans sína þriðju helgi í röð og er orðin tekjuhæsta íslenska mynd ársins. Þetta kemur fram í tilkynningu frá aðstandendum kvikmyndarinnar Lof mér að falla en þar segir ap eftir síðustu helgi hafa 34 þúsund manns séð Lof mér að falla.

Framundan hjá leikstjóra, aðalleikurum og framleiðendum er að fylgja myndinni eftir á kvikmyndahátíðina Busan í S-Kóreu þar sem Lof mér að falla mun taka þátt í World Cinema hluta hátíðarinnar. Busan er stærsta kvikmyndahátíð Asíu og fer fram 4.-13. október  og er þetta er Asíu frumsýning myndarinnar.  

Myndin segir frá hinni 15 ára gömlu Magneu en líf hennar umturnast þegar hún kynnist hinni átján ára gömlu Stellu. Magnea laðast að hispurslausu lífi Stellu og þróar Magnea sterkar tilfinningar til hennar sem Stella notfærir sér til eigin hagsbóta. Stella leiðir Magneu inn í heim fíkniefna sem hefur alvarlegar afleiðingar fyrir þær báðar. 12 árum síðar liggja leiðir þeirra óvænt saman og verður uppgjör á milli þeirra óumflýjanlegt.

Baldvin Z leikstýrir kvikmyndinni en árið 2015 sáu 48.000 manns kvikmyndina Vonarstræti sem Baldvin leikstýrði einnig.