Nýr leiðtogi verkalýðsins og sendiherra Chile í Víglínunni

Þau sögulegu tíðindi gerðust á fertugasta og þriðja þingi Alþýðusambandsins sem lauk í gær að Drífa Snædal var fyrst kvenna kjörin forseti sambandsins. Segja má að tími hafi verið til kominn í hundrað og tveggja ára sögu ASÍ að kona tæki þar við stjórnartaumum en hún tekur við á þeim tímamótum þegar samningar um 120 þúsund félagsmanna eru að losna.

Drífa mætir í Víglínuna til Heimis Más Péturssonar fréttamanns í hádeginu. En langt er í milli þeirra krafna sem þegar hafa komið fram frá fjölmennustu félögum sambandsins, Starfsgreinasambandinu og VR annars vegar og þess sem Samtök atvinnulífsins og jafnvel stjórnvöld telja framkvæmanlegt hins vegar. Drífa þekkir vel til verka innan verkalýðshreyfingarinnar en hún lætur nú af störfum sem framkvæmdastjóri Starfsgreinasambandsins.

Waldemar Coutts gerði sér ferð til Íslands í vikunni og afhenti Guðna Th. Jóhannessyni forseta Íslands trúnaðarbréf sitt á þriðjudag sem sendiherra Chile á Íslandi með aðsetur í Osló. Coutts mætir í Víglínuna til að ræða samskipti ríkjanna en í fyrstu virðist ekki margt sameiginlegt með þessu merkilega ríki Suður Ameríku og Íslandi. Það er þó fleira sem sameinar ríkin en margur heldur. Flaggskip Landhelgisgæslunnar, Þór, var til að mynda smíðaður í Chile. Þar í landi er fjöldi eldfjalla eins og á Íslandi og þar af leiðandi gnógt jarðhita sem Chile-búar horfa mjög til að nýta betur.

Víglínan er í opinni dagskrá og beinni útsendingu á Stöð 2 og Vísi klukkan 12:20