Moura fær tækifæri til að hefna sín á Emery

Lucas Moura, leikmaður Tottenham í ensku úrvalsdeildinni, fær tækifæri til að hefna sín á Unai Emery, knattspyrnustjóra Arsenal, þegar að Lundúnarliðin mætast í borgarslag í ensku úrvalsdeildinni á sunnudaginn.

Emery setti Moura í frystikistuna hjá Paris Saint-Germain þegar að þeir unnu saman þar en Moura hefur látið hafa eftir sér að verstu sjö mánuðir ferilsins voru undir stjórn Emery í frönsku höfuðborginni.

Nú mætast þeir í fyrsta sinn með sínum nýju liðum en Moura er yfir það hafinn að gera lítið úr Emery eða tala illa um hann í aðdraganda leiksins. Hann virðir Emery og ákvarðanir hans í fortíðinni.

„Ég verð alltaf að virða ákvörðun þjálfarans. Ég veit alveg að þetta var erfitt fyrir hann því hann þurfti alltaf að velja einhverja ellefu til að byrja leikina,“ segir Moura í viðtali við Sky Sports.

„Ég er ekkert að spá í því sem er búið að gerast heldur horfi ég fram á veginn og spái í hvernig ég get unnið þennan leik. Ég hef ekkert á móti Unai. Ég virði hann. Hann er mjög góður þjálfari.“

„Ég verð bara að sýna honum að ég á skilið að spila með stóru liði og að ég elska að spila fótbolta. Ég verð bara að gleyma þessum síðustu mánuðum mínum hjá PSG,“ segir Lucas Moura.