Pabba Sigmundar blöskraði og sendi „óviðeigandi“ póst á sérkennara

Gunnlaugur M. Sigmundsson, fyrrverandi þingmaður Framsóknar, forstjóri Kögunar og faðir Sigmundar Davíðs Gunnlaugssonar, sendi Félagi sérkennara harðorðan tölvupóst á dögunum. Gunnlaugur var afar ósáttur við yfirlýsingu félagsins þess efnis að Anna Kolbrún Árnadóttir, þingkona Miðflokksins, hefði aldrei verið ritstjóri Glæða, fagrímarits sérkennara. Fréttablaðið greindi fyrst frá.  Formaður félagsins segir bréfið ekki svaravert.

Anna Kolbrún er ein þingmanna Miðflokksins sem sátu á Klaustur bar þriðjudagskvöldið 20. nóvember. Á barnum sat einnig Bára Halldórsdóttir sem tók upp hávær samtöl þingmannanna í um þrjár klukkustundir. Fjallað hefur verið ítarlega um upptökurnar í öllum miðlum. Þriðjudaginn 4. desember sendi félag sérkennara frá sér tilkynningu þar sem bent var á rangfærslu í æviágrpipi Önnu Kolbrúnar á vef Alþingis.

Hún hefði aldrei verið ritstjóri Glæða heldur setið í ritnefnd. Um var að ræða aðra rangfærslu í æviágripi þingkonunnar en Þroskaþjálfafélag Íslands hafði bent á að Anna Kolbrún hefði hvorki hlotið menntun né fengið starfsleyfi sem þroskaþjálfi frá landlækni. Um er að ræða lögverndað starfsheiti.

Steingrímur J. Sigfússon, forseti Alþingis, sagði í ræðustól þingsins seinna sama dag að Anna Kolbrún hefði látið þinginu í hendur réttar upplýsingar. Mistökin væru ekki hennar heldur starfsfólks sem færir upplýsingarnar inn á vef þingsins.

Erfið veikindi

Sædís Ósk Harðardóttir, ritstjóri Glæða og formaður Félags sérkennara, segir í samtali við Vísi að félagið hafi tekið eftir þessari rangfærslu í æviágripinu þann 29. nóvember. Tölvupóstur hafi verið sendur á Önnu Kolbrúnu til að vekja athygli hennar á þessu. Póstinum hafi ekki verið svarað svo að þann 4. desember hafi tilkynning verið send út vegna rangfærslunnar.

Gunnlaugur Sigmundsson var afar ósáttur við tilkynningu félagsins og segir að verið sé að sparka í liggjandi mann. Hann vísar í samtali við Fréttablaðið til veikinda Önnu Kolbrúnar sem hafi glímt við krabbamein í lengri tíma.

„Almennt talað í dýraríkinu er þetta þannig, og þeir sem þekkja hænsnabú vita, að ef einhver hæna er veik þá fara allar hinar hænurnar að ráðast á hina veiku. Og mér finnst bara að við mann­fólkið þurfum ekki að haga okkur eins,“ segir Gunnlaugur við Fréttablaðið.

Ekki persónuleg árás

Sædís Ósk segir tölvupóst Gunnlaugs hafa verið „óviðeigandi“ og ekki við hæfi. Hann sé ekki svaraverður enda þurfi félagið ekki að svara fyrir neitt. Það hafi einfaldlega bent á staðreyndavillu.

„Auðvitað finnst okkur leiðinilegt að fólk glími við veikindi,“ segir Sædís Ósk. Það breyti því þó ekki staðreyndum. Um sé að ræða fagtímarit, ritrýnt tímarit sem sé birt í vísindasamfélaginu. Mikil áhersla sé lögð á að hafa allt á hreinu. Rétt skuli vera rétt.

„Þetta er ekki persónuleg árás á konuna heldur leiðrétting á rangfærslu.“

Stjórnarfundur sé hjá félaginu á þriðjudag þar sem tölvupóstur Gunnlaugs verði meðal annars á dagskrá.

Gunnlaugur hefur áður tjáð sig með afgerandi hætti um pólitísk mál sem snerta Sigmund Davíð. Er skemmst að minnast ítarlegs viðtals við Gunnlaug eftir umfjöllun um Panamaskjölin vorið 2016.