„Mourinho fengi 25 leikja bann“

Jurgen Klopp missti sig í gleðinni þegar Liverpool skoraði sigurmarkið gegn Everton á Anfield um helgina og hljóp inn á völlinn í fögnuði, sem er stranglega bannað samkvæmt reglum fótboltans.

Klopp var ákærður af enska knattspyrnusambandinu í gær fyrir atvikið og kemur líklega í ljós síðar í vikunni hver refsing hans verður.

Paul Merson, knattspyrnusérfræðingur hjá Sky Sports, telur að Klopp muni ekki fá mikla refsingu því hann sé Jurgen Klopp. Ef Jose Mourinho hefði gert þetta hins vegar, þá yrði refsingin mjög hörð.

„Hann fengi held ég 25 leikja bann,“ sagði Merson í þættinum The Debate.

„Ef þetta hefði verið Jose þá hefði hann verið sendur beint upp í stúku um leið og hann kæmi til baka á hliðarlínuna. Jose var rekinn út í Southampton fyrir að fara út fyrir boðvanginn.“

„Allir elska Jurgen Klopp, fyrir utan stuðningsmenn Manchester United. Þetta verður eitt af þeim brotum þar sem hann fær smá aðvörun, ekki gera þetta aftur, enginn meiddist og Marco Silva kippti sér ekki upp við þetta.“

Tim Sherwood, sem þjálfaði í úrvalsdeildinni, var einnig gestur þáttarins og hann gat skilið viðbrögð Klopp.

„Hann kann að láta alla borða úr lófanum á sér. Allir elska hann, hann sér það jákvæða í öllu og klæðist tilfinningum sínum,“ sagði Sherwood.

„Þar til þú hefur staðið á hliðarlínunni þá getur þú ekki skilið tilfinninguna við að vinna leik, hvað það þýðir fyrir alla.“