Van Dijk: Erum ekki hræddir við United

Virgil van Dijk, varnarmaður Liverpool, segir að leikmenn liðsins mæti ekki hræddir til leiks gegn Manchester United á sunnudaginn en liðin mætast þá á Anfield. Hann segir þó að þeir séu meðvitaðir um ógn United liðsins í sókninni.

Stórleikur helgarinnar í ensku úrvalsdeildinni er leikur Liverpool og Manchester United á sunnudag. Liverpool er enn ósigrað í deildinni á tímabilinu en United er í 6.sætinu, 16 stigum á eftir erkifjendunum.

Van Dijk settist niður með Jamie Carragher, fyrrum leikmanni Liverpool, og ræddi viðureignina. Viðtalið má sjá á heimasíðu Sky Sports. Van Dijk segir að leikmenn Liverpool verði að vera tilbúnir fyrir það sem bíður þeirra.

„Við vitum hverjum við erum að fara að mæta. Við erum í góðu formi og þurfum ekki að vera hræddir við eitt né neitt en við þurfum að vera meðvitaðir um að þeir eru hættulegir."

„Þeir eru með góða leikmenn, sérstaklega framarlega á vellinum, og við þurfum að vera vel undirbúnir. Að öðru leyti þurfum við bara að spila okkar leik, sjá til þess að einbeitingin sé í lagi og að við náum að setja pressu á þá."

Liverpool hefur aðeins fengið sex mörk á sig í deildinni til þessa og eru með þriðja hæsta stigafjölda sinn í sögu ensku úrvalsdeildinni eftir sextán umferðir. Van Dijk kom til liðsins í janúar og hefur verið maðurinn á bakvið bættan varnarleik. Hann segir að hann þrái að halda hreinu í hvert skipti sem hann spilar.

„Það gerir okkur stolta ef það næst. Við gerum þetta saman, verjumst saman og sækjum saman. Það er að sjálfsögðu mjög gott fyrir mig sem varnarmann að við höfum aðeins fengið á okkur sex mörk."

„Við höfum samt ekki unnið neitt, það er enn langur vegur eftir, en auðvitað erum við stoltir af þessari byrjun. Ég hef notið hverrar mínútu, það er næstum komið ár síðan ég kom hingað en tíminn hefur liðið mjög hratt."

„Þú vilt ekki tapa leik né fá á þig mark. Þetta er eitthvað sem við segjum við hvorn annan og það hefur gengið vel hingað til," sagði van Dijk.

Leikur Liverpool og Manchester United er í beinni útsendingu á Stöð 2 Sport HD klukkan 16:00 á morgun.