Bíl ekið á fólk í tískuhverfi í Tókýó

Níu manns slösuðust, þar af einn alvarlega, þegar litlum sendiferðabíl var ekið á hóp fólks sem var að fagna áramótunum á götunni Takeshita í tískuhverfinu Harajuku í japönsku höfuðborginni Tókýó. Atburðurinn átti sér stað skömmu eftir miðnætti að staðartíma.

Japanskir fjölmiðlar segja að 21 árs karlmaður, Kazuhiro Kusakabe, hafi verið handtekinn vegna málsins eftir að hafa flúið frá vettvangi.

Á hann að hafa lýst því yfir við lögreglu að árásin tengdist dauðarefsingunni í landinu, án þess þó að gefa nánari lýsingar.

Steinolía fannst í bílnum og er talið að maðurinn hafi ætlað að kveikja í bílnum.